TULO ka mga bata nga nagpangidaron pa og 12, 10 ug 5 anyos nga mga biktima sa sunog sa sitio Silangan 2, Barangay Tejero, Siyudad sa Sugbo, naligsan sa usa ka trailer truck nga nagkargag semento atol sa pagbunok sa uwan sa Miyerkules sa buntag, Mayo 1.
Duha kanila ang nangamatay samtang usa ang nabalian sa tiil.
Drayber nabun-og kay gikulata.
Ang duha nga namatay giila nga silang Mary Joy Caballes, 10, ug Angel Escarilla, 5 samtang ang nabalian sa tiil mao si Rosemarie Vasquez, 12.
Matod ni Port Police Inspector Armand May Reyes Ponce, imbestigador sa Cebu Port Authority (CPA) nga ang driver sa trailer truck nga si Joan Roble Mijares, 28, taga barangay Sac-on lungsod sa Carmen, naa na karon sa ilang kustodiya.
Matod ni Ponce nga nag-park ang trailer truck sa First Avenue, sitio Silangan 2, aron molukat og bill of lading sila si Mijares aron ikarga sa barko nga mobyahe sa Ozamis ang kargamento nga semento.
Apan wa makabantay si Mijares nga adunay tulo ka mga bata nga naa sa ilawom sa trailer kay namasilong tungod sa kakusog sa bunok sa uwan niadtong tungora.
Sa dihang ang iyang truck boy nipahibawo na nga nakuha na ang bill of lading, nipadagan dayon kini, apan gi singgitan na lang siya sa laing driver sa usa ka prime mover nga naa siyay naligsan nga mga bata.
Dali niyang gipaatras ang trak, apan wa na matabang ang duha ka mga biktima tungod sa grabeng kadaot nga ilang nahi-agoman.
“Ang driver nag expect walay nagpailawom kay nag andar man sila. Karon gisinyasan siya sa iyang truck boy nga gikan nagkuha sa bill of lading nga okay na sila, nga pwede na sila molarga, mao to milarga sila. Unya katong ilang kaatbang nga prime mover maoy nagpahibawo nila nga nakaligis sila,”asoy ni Ponce.
Tungod sa kalagot sa mga kabanay sa mga biktima, ilang gitabangan pagkulata si Ponce pinaagi sa pag bunal-bunal og tubo sa ulo ug sa nawong.
Matod ni Nilo Pilar, 50, silingan, ang mga sakop sa responding medical team nisuway sa pagtabang sa tulo, apan si Vasquez, 12, ra ang nabuhi.
“Pag-abot sa ambulansya, gi-try og pump, but wala naman madala kay nabungkag na ang sa iyang ubos (The paramedics tried to pump life into them but they could not do much because the injuries to their lower extremities were too severe),” he said.
Usa sa mga kaduwa niingon nga sa wa pa ang aksidente, ang tulo nanagduwa sa uwan, labina sa duol sa gutter sa Arellano Extension, diin gi-park ang trak.
Laung kaduwa niingon nga katapusan silang nakit-an nga nagduwa sa ilawom sa trak.
Si Nenita Caballes, inahan ni Mary Joy niingon nga wa siya sa hitabo kay namalit siya og grocery.
Nahduwa iyang anak sa iyang pagbiya.
Naa sa Cebu City Medical Center si Mijares tungod sa naangkong bun-og sa ulo ug nawong samtang si Vasquez naa usab sa maong tambalanan.
Wa pa matino kon mopasaka ba og mga kaso ang mga pamilya sa mga bata. (dugang taho ni WBS)