PULIS nga giingong maoy suspek sa pagpatay sa laing pulis nga taga Dakbayan sa Toledo niadtong Martes sa buntag, Abril 30, napatay sa mga sakop sa Provincial Intelligence Group (PIB) sa giingong engkwentro sa balay niini sa Sudlon 1, bukirang barangay sa Dakbayan sa Sugbo sa mga alas 3 sa kaadlawon sa Miyerkules, Mayo 1.
Ang mga pulis sa PIB maoy tracker team nga nigukod sa killer ni Police Master Sergeant Junard Cinco sa Media Onse, Dakbayan sa Toledo.
Sa unang report nga nadawat sa mga tigbalita, si Police Corporal Feliciano Yballe, Jr. ang suspek sa pagpusil patay kang Cinco.
Apan si Police Regional Director Brig. General Debold Sinas, sa iyang text message sa mga tigbalita, daling nihimakak nga si Yballe suspek sa pagpatay kang Cinco.
Si Cebu City Police Director Royina Garma, kinsa nibisita sa buhatan sa PIB, nikompirmar nga iyang sakop si Yballe, kinsa nadestino sa Cebu City Mobile Force Company.
Bisan si Garma niingon nga si Yballe di maoy target sa police operation, apan wa na siya mohatag pa og mga detalye kay si Sinas ra ang makaluwat og mga pamahayag.
Tanang police officials sa Cebu Provincial Police Office (CPPO) nga kuhaan unta og mga pamahayag pulos tak-om sa hitabo.
Bisan si Police Captain Alejandro Batobalonos, pangu sa PIB ug nangulo sa operasyon, nagdumili na sa pagluwat og mga pamahayag sa mga sakop sa media.
Nasayran sa Superbalita Cebu gikan sa kasaligang tinubdan nga di gustong nganlan nga wa motahan sa grupo ni Batobalonos si Yballe hinungdan nga nahitabo ang engkwentro.
Si Yballe nga nasamdan sa nagkadaiyang bahin sa lawas gidala sa Cebu City Medical Center (CCMC), apan giderklarar nga dead on arrival sa mga doktor.
Adunay duha ka mga tawo nga gisikop sa CPPO nga gipaubos na sa imbestigasyon.
Lakip sa nakuha ang usa ka Honda XRM nga motorsiklo nga way plate number.
Ang motorsiklo nihaom sa gisakyan sa killers nga nakuha sa CCTV camera sa national highway sa Barangay Media Onse sa siyudad sa Toledo.
Gibilin
Ang nga gi-custody sa kapulisan mao sila si Michael Villlendo, 35, mekaniko sa motorsiklo, ug si “Emid”, 18 anyos, kinsa nidumili sa paghatag sa iyang tinuod nga mga ngan, apan maoy giingong driver nga gisakyan sa gunman ni Cinco.
Ang duha pulos mga taga Barangay Sinsin, bukirang dapit sa Dakbayan sa Sugbo.
Si Cecilia Villendo, biyuda, inahan ni Villendo, niasoy sa Superbalita Cebu, niasoy nga niadtong Martes sa alas 6 sa gabii, usa ka motorsiklo ang iyang nabantayan nga diha gibilin gawas sa ilang kusina.
Gitabunan kini og luna.
Iyang gipangutana ang mga bata kon kinsa ang nibilin sa motorsiklo.
Nisulti kaniya ang mga bata nga bata-bata ni “Onyot”, angga ni Yballe ang nibilin.
Iya unta kining ipagawas sa ilang koral, apan gi-lock kini.
Mga alas 7 pasado, niabot si Michael, kuyog ang 25 anyos nga kapuyo sud sa lima ka tuig nga si Jonalyn, taga Minglanilla.
Pagkataudtaud, nangabot ang mga pulis sa PIB, nidakop sa iyang anak ug nikuha sa motorsiklo.
Gusto ni Cecilia nga buhian ang iyang anak sa PIB kagahapon kay wa kini labot base sa sulti ni Emid ngadto sa mga police investigator.
Si Cecilia nibutyag nga gikahadlukan si Yballe sa ilang lugar kay giingong maldito.
Sa pagsusi sa Sunstar Cebu sa Miyerkules sa hapon sa buhatan sa PIB, si Emid na lang ang naa sa custody.
Way engkwentro?
Si Sudlon 1 Barangay Captain Dante Tabucal, nga nahinabi sa Sunstar Cebu, niingon nga base sa sulti sa iyang mga sakop, nangabot ang mga pulis gikan sa Toledo City Police Station ug Special Weapons and Tactics (Swat).
Nanulod kini sa balay ni Yballe sa wa pa siya mamatay.
Dunay mga nag-uniporme ug duna say wala.
Si Tabucal niingon nga moresponde unta ang mga tanod sa police operation, apan gisultihan sila sa dili pagduol sa balay.
“Di sila kasud didto kay gipugngan sila sa mga police,” nagkanayon si Tabucal.
Wa sila masayod si Tabucal kon unsa ang operasyon kay wa makig-coordinate kanila ang mga pulis.
“Walay coordination nga nahitabo,” pasabot ni Tabucal.
Human mosulod ang mga pulis sa balay ni Yballe, mga tanod nakadungog mga singgit, dayon nisunod ang mga buto sa pusil, nagkanayon si Tabucal.
Si Tabucal niingon nga mga alas 9 na sa buntag sila nangadto uban sa mga sakop sa Cebu City Police Office, apan wa na si Yballe kay gidala sa Scene of the Crime Operatives (Soco) sa CCMC.
Si Yballe diha sud sa balay uban sa iyang kapuyo ug duha ka mga anak atol sa hitabo.
Matod ni Tabucal sa Sunstar Cebu nga ang kapuyo ni Yballe wa moluwat og mga pamahayag kay naa pa kini sa state of shock.
Gilibutan
Si Jerome (tinuod nga ngan gipugngan alang sa iyang seguridad), niingon nga ang balay ni Yballe gilibutan sa labing minos 20 ka mga tawo, dunay nag-uniporme ug dunay wala.
Human ablihi ang mga pulis sa kapuyo ni Yballe, ang babaye gidala ngadto sa ilang (Jerome) balay. Gisultihan dayon sila sa di pagpaduol sa dapit.
Paglabay sa pipila ka minutos, nakadungog dayon siyag mga unom ka buto sa armas.
Wa unta magtingog ang kapuyo ni Yballe, apan human makadungog sa mga buto, nisinggit kini nga naa sa sulod ang ilang mga anak. (AYB, GPL & JMJL sa SunStar Cebu)