MGA inahan sa tulo ka mga bata nga naligsan sa usa ka 18-wheeler truck sa Barangay Tejero nituyo sa Cebu Port Authority alang sa gihimo nga settlement.

Wala na magtinguha pa nga mopasaka og kaso ang tulo ka mga inahan nga sila Nenita Caballes, inahan sa 10-anyos nga si Mary Joy, Mary Ann Escarilla, inahan sa 5-anyos nga si Angel ug Maricar Vasquez, inahan sa 12-anyos nga si Rosemarie.

Nasayran nga silang Mary Joy ug Angel ang namatay, samtang si Rosemarie ang operahanan.

Si Joan Mejares, 28, ang drayber sa 18-wheeler, ang kasamtangang gitanggong sa Cebu Port Authority detention cell, nangayo og pasaylo sa pamilya sa mga biktima.

Nitug-an si Mejares nga 15 minutos lang siya nga nag-park sa maong lugar tungod nagpaabot siya sa iyang kauban, kinsa nag-asikaso sa papeles aron pagdeliver sa mga karga sa pier.

Matud niya nga nag-andar ang sakyanan samtang nag-park, ug sa dihang gikamay sa iyang kauban nga moabante na, wala siya kahibalo nga aduna'y mga bata nga anaa sa ilawom sa van nga iyang karga.

"Mangayo gyud ko'g pasaylo sa pamilya. Nasakitan sad gyud ko kay nahibaw-an pa nga naa to'y mga bata, dili gyud tawon 'to mahitabo. Ambot kon ngano naa didto ang mga bata nga nag-andar man ang sakyanan. Disgrasya gyud. Pasayloa gyud ko," saysay ni Mejares.

Ang mga inahan nipadayag nga dili na sila mopasaka og kaso ug andam alang sa settlement kay nadawat usab nila nga disgrasya ang nahitabo.

Gipaabot nalang ang pagpinirmahay sa kasabutan tali sa representante sa Powerade Cargo Services, ang kompanya nga nanag-iya sa 14-wheeler truck.

"Dili nalang mi anang kaso-kaso kay dili naman gyud mabalik ang kinabuhi sa mga bata. Ang amo matabangan mi sa pagpalubong ug uban assistance. Leksyon gyud namo mga ginikanan, naa mi pagkulang. Ug leksyon sad nila mga driver nga mosusi gyud before molarga," asoy ni Caballes.