MILAMPOS man tuod ang Denver Nuggets sa pagkontrolar ni Damian Lillard kinsa mipahagsa og 39 puntos sa Game One, apan gipamatuod sa Portland Trail Blazers nga dili lang usa ka tawo ang gisaligan sa ilang team.
Sa Game Two kagahapon sa Western Conference semifinals series, ang kauban ni Lillard maoy nahimong mahait nga hinagiban sa Portland sa dihang gikulit ang 97-90 nga kadaugan nga nagtabla sa ilang serya, 1-1, didto sa Pepsi Center, ang korte sa Nuggets.
Ning higayona, si CJ McCollum mao ang mibida ug maoy mihulip sa papel ni Lillard kinsa igo lang nakahagdaw og 14 puntos nga ubos kaayo sa iyang 34.8 nga average sa playoffs.
Ang series motapon ngadto sa korte sa Portland alang sa Game 3 ugmang adlawa ug nanghinaot si Lillard nga dili motapon sa Moda Center ang iyang dimalas.
Kagahapon si Lillard nasipyat og 14 ka higayon sa iyang 19 ka itsa sa three-point area
“It’s very important,” matod ni Enes Kanter, kinsa nakatampo usab og 15 puntos alang sa Portland. “Teams can’t guard him with one man. They were sending double-teams, triple-teams. That’s when I said, ‘He’s making himself better, but at the same time he’s making everybody else better around him.’ He was passing the ball, really active on defense. He’s been unbelievable, man.”
Sa third quarter, nakuhaan ang 17 puntos nga labaw sa Portland ngadto sa 95-90 sa katapusang minuto hangtod nga nabuak ni Rodney Hoods ang kahilom sa Blazers pinaagi sa iyang duha ka free throws sa katapusang 17 segundos.
“The good news is they had all of those offensive rebounds but they didn’t convert a lot,” matod ni Portland coach Terry Stotts.
Si Nikola Jokic mikadlit og 16 puntos ug 14 ka rebounds apan uga kaayo kini nga nakasugod sa duwa nga dakong sukwahi sa iyang gihimo sa Game One diin siya nakaposte og 37 puntos.
“The last quarter we missed a lot of put-backs, but 23 offensive rebounds is a big number,” padayag ni Jokic. “The first half we had open shots but we didn’t make any of those.”
Samtang sa laing bahin, posibling dunay dakong kausaban sa lineup sa Philadelphia Sixers kon og galing dili gihapon sila makasulbad sa Toronto Raptors sa nagpadayon nilang Eastern Conference semis.
Karong buntag dinhi sa Pilipinas, buk-on sa Sixers ug Raptors ang ilang panagtabla, 1-1, sa Game 3 sa ilang best-of-seven series.
Ang tinubdan nagkanayon nga sa Game 2 ang ilang bag-ong kaplag nga si Jimmy Butler maoy mibituon sa ilang kadaugan.
Mahimong third option ra man tuod siya sa team, sunod nila ni Joel Embiid ug ni Ben Simmons, apan sa iyang gipakita sa Game Two daghan ang mihanga sa iyang paggiya sa Sixers ngadto sa ilang unang kadaugan didto sa korte sa Toronto sukad pa niadtong Nobiyembre 2012.
Apan karong summer, si Butler kinsa nakuha gikan sa Minnesota Timberwolves sa sayong bahin ning tuiga, mahimo na usab nga free agent ug kaduhaduhaan pa kon magpabilin ba siyia sa Sixers. (JBM)