MGA dagkog pangalan nga malakip sa free agency atol sa bakasyon sa National Basketball Association (NBA) - sama kanila ni Kevin Durant, Kawhi Leonard ug Tobias Harris - gikonsiderar nga posibling motapon usab sa Brooklyn Nets.
Ang SportsNet New York reporter nga si Anthony Puccio mibutyag nga wala karon isalikway sa mga free agents nga ang Nets maoy ilang sunod nga destinasyon inig ka pupos na sa 2018-2019 season.
Hinuon, aron makakuha og duha ka mga star players nga kahatagan nila og maximum nga suweldo, gikinahanglan usab ngailang mabuhian si D’Angelo Russel kinsa mao karon ang ilang nag-unang pambato.
Ang Nets mitapos sa ilang kampanya human kini mapildi sa 1st round sa playoffs, 1-4, sa mga kamot sa Philadelphia Sixers.
Laing team ang gihugonhugonan nga kapadulngan usab ni Kevin Durant sa sunod season mao ang New York Knicks. (JBM)