KON nangita ka og kasuroyan nga duol sa kinaiyahan adunay tinaguang hiyas ang Tanjay City, Negros Oriental ang “Tanjay Mangrove Boardwalk” nga nahimo nang inila sa local ug foreign tourist.
Gihulagway nga “interesting and visit worthy” ang maong dapit gumikan sa iyang talagsaong concept.
Dili magmahay ang kadtong mag-selfie o groufie kay daghang anggulo sa inyong paghulagway nga Instagrammable o pang-Facebook post nga siguradong makadani sa inyong friends diha sa social media.
Bakhawan
Haom usab kini niadtong mahiligon og adventure diin ang maong taas nga kutay sa boardwalk paingon ngadto sa nagtapok nga mga punoan sa bakhaw nga inyong masud-ong lahos na ngadto sa dagat.
Gibana-bana nga kapin sa 150,000 ka mga bakhaw ang anaa sa maong dapit ug pipila niini adunay gitas-on nga 6-feet.
Dili mabalaka tungod kay very affordable ang entrance fee sa boardwalk nga P50 ug mamahimong makadala og pagkaon o mo-abang sa ilang cottages.
Bukas ang boardwalk sa publiko gikan sa 8:00 sa buntag paingon na sa 6:00 sa hapon matag adlaw.
Tourist spots
Kon anaa kana sa syudad, ayaw usab sipyata ang pagduaw ang St. James the Great Parish ug ang tapad niini nga Rizal Park.
Matag gabii, mamahimong mag-standby sa Rizal Park ug mag-enjoy sa lamian nga pagkaon atol sa inyong pag-relax.
Tanjay’s budbod
Sa higayon nga hisgutan ang siyudad sa Tanjay automatic mosantop sa huna-huna, ang famous delicacy sa maong lugar ang ilang lamian nga budbod, gani matag Disyembre adunay ipahigayon nga Budbod Festival.
Sukwahi sa naandan nga budbod sa ubang dapit o ‘suman’ sa Tagalog nga bugtong pilit ray main ingredient ang Tanjay’s budbod adunay tsokolate nga gipatung-an sa pilit.
Mosamot ang kalami niini sa higayon paresan og home-made sikwate o ba kaha hinog ug tam-is nga mangga, sulbad na ang inyong merienda.
Bugtong Tanjayanon ray nasayod sa sekreto sa lamian nga timpla o pagluto sa maong budbod.
Unsaon pag-adto
Ang Tanjay City nga gilangkuban og 24 ka barangay, usa ka fourth class nga munisipalidad nga sakop sa probinsIya sa Negros Oriental, adunay gilay-on nga 199 kilometros kon gikan sa Cebu City.
Kadtong manukad sa dakbayan sa Sugbo mamahimong mosakay og bus sa South Bus Terminal paingon sa Bacolod kay malabyan sa biyahe ang Tanjay City.
Sa mga nagplano nga magbakasyon ning panahon sa summer ilakip sa lista sa inyong itinerary ang Tanjay ug siguradong dili gyud mo magmahay.