KARONG adlawa, petsa 3 sa Mayo magsugod ang employment period sa mga batan-on nga mga nadawat karong summer sa tinuig nga gitanyag sa Kapitolyo Probinsyal nga mao ang Special Program for the Employment of Students (SPES).
Sa niaging semana unang gianunsyo ni Zorobabel W. Rabe, Public Employment Service Office (PESO) department head, nga mokabat sa 1,100 ka mga slots ang gitanyag karon sa kagamhanan kon hain ang employment period sa mga nipasar nga aplikante magsugod deretso Huwebes Mayo 3 ngadto sa Mayo 30 diin sila adunay 20 ka adlaw nga summer job.
Sa wala pa sila gipasugod sa trabaho, aduna pay orientation ang gihimo sa silangan ug kasadpang bahin sa probinsya kon hain niadtong petsa 2 sa Mayo gipahigayon ang orientation sa Moresco I Complex sa lungsod sa Laguindingan samtang sa silangan nga bahin sa lungsod sa Lagonglong.
Gipasabot sab niini nga ang pundo nga gigamit alang sa i-sweldo sa mga nag summer job ang gikuha gikan sa Bambi Employment Welfare Assistance.
Ang mga aplikante gikuha gikan sa nagkalain-laing barangay sa lungsod ug kini sila nga mga batan-on giandam aron nga makakat-on og skills ug workplace experience.
Ang ilang suholan dako sab og tabang alang pagpalit sa mga gamit pang-eskwela hilabina sunod bulan na ang tingklase.