Rabacal: Dumadaog pagka-senador

ADUNAY nagkalainlaing panagna sa mga kandidato nga modaog niining umaabot nga piniliay karong Mayo 13. Anaay akong higala, nga naghupot kanhi og taas nga posisyon sa dakbayan sa Sugbo, nga nagtuo nga lima ka mga babaye ug lima ka mga lalaking kandidato pagka-senador ang siguro nang modaug sa 2019 election. Sila mao ang re-electionist senators Grace Poe, Cynthia Villar, Nancy Binay, Ilocos Norte Governor Imee Marcos ug Kongresista Pia Cayetano. Sa mga lalaki sila si Bong Go, Bato dela Rosa, Lito Lapid ug re-electionist senators Sonny Angara ug Koko Pimentel . Entonces, kon mao kini duha nalang sa mga kandidato ang mag-ilog sa katapusang duha ka mga pwesto. Sumala niya nga ang mag-ilog niini mao sila incumbent senators JV Ejercito ug Bam Aquino apil ang mga kanhi senador Jinggoy Estrada, Bong Revilla, Mar Roxas, Francis Tolentino ug Serge Osmeña.

Sa laing bahin ang usa ka inilang abogado nga usa ka political observer mikutlo sa resulta sa survey sa Pulse Asia. Sa iyang post sa Facebook iyang gibasihan ang maong survey nga nagpakita nga sila si Poe, Villar, Cayetano, Go, Angara, dela Rosa ug Revilla ang modaug kon ang eleksiyon himuon karon. Ang upat nga mag-ilog sa nahabiling pwesto mao sila si Binay, Pimentel, Aquino ug Ejercito.

Samtang ako nagtuo sa mga political survey labi na sa Pulse Asia ug Social Weather Stations (SWS) apan kini naglangkub lamang sa National Capital Region (NCR), rest of Luzon, Visayas ug Mindanao. Wala kini maglakip sa mga Overseas Filipino Workers (OFWs). Atong nasayran nga kadaghanan sa mga OFWs ang mituo sa pamunoan ni Presidente Duterte. Daku kining mapuno nga botos sa mga kandidato nga giduso ni Duterte. Duna hinuoy daghang dili mutoo sa mga poltical survey apan mas maayo nga ato nalang paabuton ang resulta sa Mayo 13 nga mid-year election.

Sa local politics, dili pa gayud masiguro kon si kinsa ang nag-una sa mga kandidato sa pagka-kongresista, gobernador, bise gobernador, bokal, mayor, bise mayor ug konsehal. Wala pa kining gitawag nga ground swell kon grabeng pagsaka sa mga dumadapig sa usa ka kandidato. Hangtud karon nagpadayon pa ang linabayay og lapok sa kadaghanan sa mga kandidato. Ato kining mabasa sa mga kampanya sa ubang mga kandidato. Daghang nagtuo nga dako ang pabor nga makuha sa mga pulitiko nga giduso ni Duterte busa anaay daghang mga isyu batok sa presidente ug sa iyang pamilya ang gipakatap karon sa mga pamantalaan, social media ug sa broadcast. Anaa na karoy mga pusta-anay apan gibasi kini sa ilang lealtad sa usa ka kandidato. Bisan ang mga Filipino nga akong nahimamat didto sa Estados Unidos (US) misalig sa pamunoan ni Presidente Duterte apan ang uban wa lang maka-uyon sa pamalikas ug paghisgut niya batok sa simbahang katoliko. Ang uban nahadlok lang nga tingalig adunay mangamatay sa kampanya batok sa ginadiling drugas nga masaypan lang. (mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph