GIPADAYAG sa kampo sa Team Deretso sa mga Radaza nga dakong mugna kun “gimik” sa ilang kaatbang sa politika nga si Pajo barangay captain ug mayoralty candidate sa Team Ahong nga si Junard “Ahong” Chan ang pagkapusil sa iyang giingong supporter nga si Cesar Siaton sa Purok Rambo, Barangay Babag, dakbayan sa Lapu-Lapu sa miaging Sabado, Abril 29.
Kini gumikan kay kung basehan ang mga nangaging piniliay nga midagan si Chan atbang sa mga Radaza kanunay gayud mahitabo ang mga susamang panghitabo samtang nagsingabot ang piniliay.
Gihimong basehanan sa Team Deretso mao ang nahitabo niadtong 2010 diin si Chan midagan pagka mayor atbang ni Lapu-Lapu City Mayor Paz Radaza diin adunay nahitabong pagpamanhig sa Brgy Hall sa Canjulao gumikan kay matod pa plano unta niining ipaubos sa Comelec control ang dakbayan ug sa ingon pagkuha sa simpatiya sa katawhan.
Sa 2013 ug 2016 nga wala modagan si Chan atbang sa mga Radaza walay usay kagubot o panghitabo sama sa pagpamanhig ug pagpamusil.
Karon na usab kini masubli dihang midagan na usab si Chan batok ni kanhi Congressman Arturo “Boy” Radaza.
Matod ni Lapu-Lapu City Mayor Paz Radaza nga nakasabot siya ni Chan kung desperado na kini ug simpatiya sa katawhan hinungdan nga mag mugna-mugna kini ug mga gimik apan sa nahitabo sa iyang supporter nga si Siaton diin nakabsan gayud kini sa kinabuhi dili usab kini maayo nga paagi.
Dugang sa mayor nga base sa survey layo ug biya si Chan sa iyang bana hinungdan nga desperado na kini.
Nakakwestyon ang mayor sa pagka atol sa hitabo sa iyang supporter nga si Siaton gumikan kay tulo ka adlaw sa wala pa mapusili si Siaton si Chan nagpasiatab na nga adunay plano nga banhigan siya.
Si Siaton giingong gitabangan na hinuon sa mga Radaza sa iyang bayranan sa ospital dihang wala pa kini makabsi sa iyang kinabuhi ug ang pagpalubong ug paghaya unya niini.
“Kaning mga ingon-ani ni Ahong anad man gud ni siya sa mga drama-drama, so, tan-aw nako ang nakapait lang kay dunay namatay. Nagdrama lang unta siya og unsang drama nga walay tawong makalas okey raman gyud na kay kami anad man mi motan-aw og sine,” matod ni Radaza.
Ang mga pangangkon sa Team Deretso gidasonan sa mga kanhi kauban ni Chan niadtong tuig 2010 nga gipangulohan ni kanhi Department of Interior and Local Government DILG undersecretary Lito Ruiz kinsa mibutyag sa ilang “gimik” kaniadto pagpaarak sa Brgy Hall sa Canjulao aron makakuha ug simpatiya sa katawhan dihang misuporta pa ang ilang pamilya sa kandidatura ni Chan nga hugot gayud unta niyang gisupak kaniadto.
Nahibulong si Ruiz nga inay tabangan ni Chan ang iyang supporter nga si Siaton human kini napusilan iya pa kining gi-videohan hangtod sa pagdala sa tambalanan ug gipasuot pa og t-shirt sa iyang kampo.
Si Chan sa iyang bahin mipadaplin sa obserbasyon ug pangangkon sa mga Radaza ug mibutyag nga mugna lang kini sa ilang huna-huna gumikan kay nakuyawan na sila sa iyang kanidatura.
Iya usab gihulagway nga binayran ang kanhi niya mga kauban kaniadto sama ni Ruiz aron mopasiatab ug mga sayop nga estorya batok kaniya.
Matod ni Chan nasuya lang ang mga Radaza kaniya gumikan kay mangunay siya sa iyang trabaho isip opisyal sa iyang Barangay ug mao usab ang iyang mahimong mabuhat sa higayon nga siya na ang molingkod isip mayor sa dakbayan.
Subling gibarogan ni Chan nga aduna siyay nadawat nga “death threat” sa pagkakaron gumikan kay plano gayud siyang tipion sa iyang mga kaatbang gumikan sa kalig-on sa iyang kandidatura ug makita sa survey nga siya maoy kanunay nag-una sukwahi sa pasiatab sa mga Radaza.
“Magmugna lang gyud ko para dunay makalas para unsa man? Nganong maghimo man ko nga klaro ug tataw man kaayo ang pulso sa katawhan nga dumadaog ta nganong maghimo man ko og milagro wala man na sa akong bokabularyo nga maghimo og in-ana? Sila maoy naay record,” matod ni Chan.
Ang kapulisan wala pay matumbok nga suspek sa pagpusil patay ni Siaton apan gisalikway na nila nga dili election related ang hitabo. (GCM)