GIKOMPIRMAR sa Philippine Atmospheric, Geophysical and Astronomical Services Administration (Pagasa) nga molungtad hangtod sa buwan sa Agusto base na usab sa nagkadaiyang El Niño forecast models.
Matod sa officer-in-charge (OIC) sa Pagasa Visayas Engr. Al Quiblat nga nagtugma ang forecast sa Pagasa sa laing 30 ka El Niño forecast model sa 30 ka nasod.
Dugang ni Quiblat nga karong buwana, Mayo, maoy kritikal nga buwan sa El Niño phenomenon tungod kay mas grabe ang kainit nga masinati.
Hinuon bisan paman og sa buwan sa Agusto pa molungtad ang El Niño, nibutyag si Quiblat nga mo-normalize na ang uwan sugod sa Hunyo.
Gibutyag usab niini nga natala niadtong Abril 20 ang labing init nga temperatura sa Sugbo diin anaa kini sa 34.6 degree celcius itandi sa labing taas nga temperatura niadtong 2018 nga anaa sa 34.5 sa buwan sa Mayo.
Gihulagway ni Quiblat nga mas mosaka pa kini ngadto sa 35 degree celcius.
Samtang niubos og maayo ang ma-supply sa Jaclupan Dam sa Metropolitan Cebu Water District (MCWD).
Matod sa tigpamaba nga si Charmaine Rodriguez-Kara nga anaa nalang sa 7,000 cubic meters ang ma-supply sa maong facility matag adlaw, naa sa 33,000cu.m. ang normal niini.
Nisusi na usab ang MCWD sa reklamo sa ilang konsumidor nga wala gihapoy agas bisan og adlaw sa ilahang Store Water Advisory.
Lakip sa dapit nga wala gyud niagas na ang Barangay Tisa, Punta Princesa ug Mambaling.
“The El Nino is a natural phenomenon. We expect our surface water sources to dry up. We are fast tracking the development all new sources, mostly groundwater wells. We will be ready to treat contaminated water and will ask private bulk water suppliers to give us more,” si Kara subay niining paglungtad sa El Niño sa buwan sa Agusto.
“As we brace for the impact of a prolonged dry spell, we urge all Cebu water users to develop a habit of conservation and to use water wisely,” dugang niya.