DAGHANG mga mag-uuma ang nabalaka na og dako gumikan sa padayon nga pagtiurok sa presyo sa humay ning panahona.
Nasayrang padayon ang pag-ubos sa presyo niini bisan pa sa katapusang semana sa Abril ning tuiga.
Subay sa datos sa Philippine Statistics Authority (PSA), niubos kini ngadto sa tag P18.70 matag kilo gikan sa P20.55 matag kilo sa maong panahon sa milabay nga tuig.
Ang pinakabarat nga presyo sa humay nga natala mao ang Caraga Region nga tag-P16.33 matag kilo. Samtang ang pinakataas naa sa Central Visayas Region nga tag P21.21 matag kilo.
Ang presyo sa humay nasusama na hapit sa presyo sa kopras nga nituorok sab hangtud sa tag P13 matag kilo bag-ohay pa lang.
Nagyangongo ang mag-uuma sa humay tungod kay dako ang ilang gasto, wa pay labot ang ilang hago, unya kon paliton gikan kanila hapit na lang pangayuon.
Samtang, kon ang bugas moabot na sa palengke, grabe na kamahal nga moabot og tag P50 matag kilo.
Naa man tuoy National Food Authority (NFA) nga namalit og humay sa tag P20.70 ang matag kilo gikan sa mga mag-uuma, apan di gihapon kini paigo aron nga makabawi sa gasto sa pagtanum.
Mao na kaha kini ang epekto sa Rice Tariffication Law nga gipatuman dinhi sa nasud?
Basin unya og sa pagdaghan na sa bugas nga mosulod dinhi sa Pilipinas tungod sa maong balaod, mas mobarato pa kaayo ang presyo sa humay nga maoy makapurdoy sa mga mag-uuma.
Nabalaka kita nga basin sa taliabot nga mga panahon, wala nay mag-uuma nga motanum og humay tungod kay di na nila kaya ang pagpamalit og abuno alang niini kay kuwang pa man gani sa ilang panginahanglan sa balay.
Basin pag-abot sa panahon, magsalig na lang unya kita sa laing mga nasud aron nga mopakaon nato kay wa na tay maani nga humay dinhi sa nasud?