GILUNUPAN ang pipila ka lugar sa poblasyon sa dakbayan sa Davao sa pagbundak sa kusog nga ulan nga nagsugod sayo sa hapon, Miyerkules, Mayo 1, hangtud na sa gabii.
Ang tubig-baha nga moabot sa tuhod nga bahin, nakatanggong sa pipila ka mga tawo kon diin problema sa kanal maoy gitumbok nga maoy hinungdan.
Sa paghinabi kang Davao City Disaster Risk Reduction Management Council (CDRRMC) operation officer Rodrigo Bustillo, siya nagkanayon nga kasagaran nga naapektuhan nga lugar naa lang sa sentrong bahin sa dakbayan ug kasagaran sa kadalanan lang.
Iyang gitumbok ang suliran sa drainage system nga maoy hinungdan sa baha. Dugang pa niya nga lain nga hinungdan mao ang mga gambalay ug istraktura nga gitukod kilid o kaha ibabaw sa kanal nga nakaapekto sa dagan sa tubig.
Bandang alas 10 sa gabii sa maong adlaw, ang kanal sa may Roxas Avenue niawas.
Komentaryo gikan sa usa ka molupyo nagkanayon, “The horizon may be promising and industrialization is just at arm’s length away for you, but please, please, please come up with a well laid out city plan where urbanization can be done slowly and surely without compromising nature, just like Singapore, Japan.”
Subay sa Philippine Atmospheric, Geophysical and Astronomical Services Administration (Pagasa) Thunderstorm Advisory No. 4 nga gipagawas alas 7:50 sa gabii sa maong adlaw, ilang gibanabana nga dunay hinay ngadto sa kusog nga ulan uban sa pagpangilat ug kusog nga hangin tungod sa pagpanalugdog nga nasinati sa pipila ka bahin sa Mindanao.
Mga naapektuhan nga lugar mao ang siyudad sa Davao, taas nga bahin sa Zamboanga del Sur, Zamboanga Sibugay (Mabuhay, Talusan, Alicia, Malangas, Diplahan, Buug), Lanao del Sur, Lanao del Norte (Sultan Naga Dimaporo, Nunungan), Bukidnon (Quezon, Valencia, Talakag, Manolo Fortich, Sumilao), North Cotabato, Maguindanao, South Cotabato (Surallah, Lake Sebu), Davao del Sur (Digos City, Sta.Cruz, Bansalan).
Mga molupyo nga nagpuyo sa maong mga lugar gitambagan nga mag-amping sa mga flashfloods ug landslides. Pipila ka mga manakayay natanggong sab tungod sa baha.
Samtang si Bustillo nagbutyag nga dunay landslide nga nahitabo bandang alas 11 sa gabii sa maong adlaw sa Wellspring 3, Barangay Catalunan Pequeno, Tugbok District, siyudad sa Davao.
Human sa insidente, niawhag sila og preemptive evacuation sa upat ka mga balay nga maapektuhan niini.
“Four houses directly affected if ground movement will continue, and there is a sign of continues and gradual movement. No casualties [was reported], one family transferred temporarily to their relatives, but the rest still stay in their houses. We already inform them the risk if they keep on staying their houses,” tug-an ni Bustillo. (JCR)