GISUBHAN ni Pres. Gloria Macapagal-Arroyo kagahapon ang duha ka mga dagkong proyekto sa lalawigan sa Sugbo nga nalakip kini sa iyang programa nga dugang mopalambo sa turismo.
Nikantidad tanan og P130 milyunes ang gisubhang proyekto ni Arroyo nga karsada sa lungsod sa Medellin ug Daanbantayan ug taytayan sa dakbayan sa Mandaue.
Ang duha ka mga proyekto gitinguha alang sa pagpasayon ug pagdali sa mga molupyo ug turista sa pagpadong ngadto sa ilang tagsa-tagsa ka mga destinasyon paingon sa amihanang bahin sa lalawigan.
Mokantidad og P100 milyunes ang gibuksan nga Curva-Medellin-Daanbantayan-Maya road nga ang karsada may gitas-on ning 6.45 kilometros nga si Kong. Benhur Salimbangon maoy naninguha nga makonkreto kini.
Gisugdan ang proyekto niadtong Abril 10 sa milabayng tuig ug natapos niadtong Disyembre 30, 2010.
Samtang, ang Cabancala-Canduman Bridge nikantidad nig P30 milyunes nga gisugdan nig trabaho ninadtong Marso 26 sa milabayng tuig ug nahuman kini niadtong Diysembre 5, 2009.
Gitumong ang proyekto sa pagminos sa problema sa dagan sa trapiko niadtong moagi sa Mandaue kansang mao kini ang labing mubo rota paingon sa Cabancalan ngadto sa Canduman ug pabalik.
Uban kang Arroyo nga mosubo sa mga proyekto silang Department of Public Works and Highways (DPWH) Secretary Victor Dominggo ug Press Secretary Crispulo Icban Jr. uban nila ang lokal nga opisyal diin didto sa Medellin ug Daanbantayan si Salimbangon ug Mdellin Mayor Ricardo Ramirez samtang silang 6th District Cong. Nerissa Soon-Ruiz ug Mandaue City Mayor Jonas Cortes sa Mandaue.
Kagahapon sa gabii, ang presidente gipasidunggan sa kagamhanan sa dakbayan sa Sugbo atol sa ilang 73rd Charter Day celebration diin hatagan siya labing unang Order of Rajah Humabon.