ANG Regional Trial Court sa Danao City niaprobar petition for bail nga giduso nila ni San Francisco, Camotes Mayor Aly Arquillano ug Vice Mayor Alfredo Arquillano Jr.
Si retired judge Meinrado Paredes, kinsa maoy nagsilbeng lead counsel sa duha ka mga akusado, nikompirmar sa mao nga kalambuan.
Si Paredes niingon hinuon nga sa Huwebes, Mayo 2, wa pa siya makadawat og kopya, apan siya gipahibawo sa ubang mga abogado kalabot sa kalambuan.
Ang magsuong Arquillano gipasakaan og mga kasong kalapasan sa Republic Act (RA) 9516 tungod sa illegal nga paghupot og eksplusibo ug Republic Act (RA) 10591 tungod sa ilegal nga paghupot og mga armas ug bala.
Ang ilegal nga paghupot og explosives way pyansa nga kalapasan hinungdan nga ang mga Arquillano ningduso og petition for bail.
“If the prosecution will fail to prove that the evidence of guilt is strong, the non-bailable offense will be bailable,” nagkanayon si Paredes.
Gawas sa petition for bail, matod ni Paredes nga naghuwat usab sila sa desisyon sa korte sa motion to quash search warrant nga ilang gi-file.
Ang motion, kon uyonan, mo-nullify sa search warrant.
Niabot na kagabii, Huwebes, Mayo 2, ang mga Arquillano sa Camotes human sila buhii. (RVC sa SunStar Cebu, dugang taho ni SCG)