NABUAK ang ulo sa drayber sa motorsiklo sa dihang nahug sa Marcelo Fernan Bridge habig sa dakbayan sa Lapu-Lapu human nidumbol sa kilid nga bahin sa tulay samtang nagpaingon sa barangay Pusok.
Si P01 Romello Adolfo sa Traffic Division sa Lapu-Lapu City Police Office (LLCPO) nagtuo nga na-overshoot ang biktima sa kurbadahong bahin sa tulay.
Ang biktima mao si Richard Antona, 33, diin base sa iyang voter’s ID residente sa barangay Ibo, dakbayan sa Lapu-Lapu apan base sa iyang driver’s license nagpuyo sa Basak, dakbayan sa Mandaue.
Matod ni Adolfo, pasado alas 4:00 kagahapon sa hapon, ilang nadawat sa alarma ug naabtan nalang nga nagbuy-od na diha sa kalsada ang lawas sa biktima sa kilid nga bahin sa monument ni Marcelo Fernan.
Samtang nahibilin ang motorsiklo nga adunay plate number 9143-GD sa ibabaw nga bahin sa tulay kansang headlight nabuak gumikan sa impact sa pagkabangga sa sementado nga kilid sa taytayan.
Ang biktima gidala sa mga sakop sa Emergency Rescue Unit Foundation (ERUF) sa Cortes General Hospital sa Mandaue City nga gideklarar nga dead-on-arrival (DOA). (FVQ)