NIPAGAWAS ang Davao City Anti-Scam Unit (ASU) og “cease and desist” order batok sa Rigen Marketing, human napakyas sa pagkuha og business permit aron nga mo-operate dinhi sa dakbayan.
Niadtong Biyernes sa buntag, Mayo 3, ang mando gipagawas subay sa instruksiyon sa City Business Bureau, nga nagkanayon nga ang establisemento nakalapas sa mga probisyones sa Ordinance No. 0291-17, series of 2017, usa ka ordinansa nga nagkoriher sa 2005 Revenue Code of the City of Davao nga labing nailhan isip “2017 Revenue Code of the City of Davao”.
Gikanayon ni ASU head Simplicio Sagarino nga ang yunit nasayud na sa operasyon sa Rigen una pa ang pagpagawas sa kamandoan.
“Before mi nag-issue sa cease and desist order, giistoryahan namo ang mga representatives kauban ang lawyer. Actually, before namo sila gi-meet, nagpadala nami og sulat sa ila last April 29,” saysay ni Sagarino ngadto sa SunStar Davao.
Matud niya nga ang Rigen di maka-operate gawas kon motuman sila sa mga gikinahanglan, naglakip sa permiso gikan sa Business Bureau, Bureau of Internal Revenue (BIR) ug clearance gikan sa Securities and Exchange Commission (SEC).
Apan giklaro ni Sagarino nga ang mando di “scam-related”, ug way reklamo nga niabot ngadto sa ilang yunit.
Apan gikanayon ni Sagarino nga ang Rigen motuman sa mga rekisito sunod semana.
Sa pagkakaron, nagpasidaan ang ASU ngadto kanila nga di modawat og mga miyembro o mohimo og mga transaksiyon sa siyudad, gawas lang kon makakuha og permit.
Samtang, giawhag ni Sagarino ang publiko nga magbinantayon sa pagtransak og kuwarta.
Ang SunStar Davao padayon nga nangita og pamaagi aron nga makuha ang bahin sa Rigen Marketing sa maong hisgutanan.