TATAWNG nadasig sa naglanoglanog nga abiba nga “MVP!,” si Joel Embiid nagmangtas aron agakon ang host Philadelphia 76ers ngadto sa dakong kadaugan batok sa Toronto Raptors, 116-95, sa Game 3 nga maoy naghatag kanila og 2-1 nga bintaha sa Eastern Conference semi-finals series sa National Basketball Association (NBA) 2019 Playoffs kagahapon.
Nagpakatap si Embiid og 33 puntos ug 10 rebounds aron pangulohan ang 76ers, nga aduna pa’y laing lima ka mga magduduwa nga ningmugna og dobleng numero nga puntos.
“When I have fun, my game just changes,” matod ni Embiid. “I’m always told if I don’t smile during the game it means I’m having a bad game or I’m not into it. I know to get my game going, I’ve got to have fun on the court.”
Ang 76ers, nga katapusang nahimong kampiyon niadto pang 1983, nakadawat sab og 22 puntos gikan kang Jimmy Butler, 15 gikan kang JJ Redick, 13 gikan kang Tobias Harris, 10 gikan kang Ben Simmons ug 10 sab kang Josh Ennis.
Human sa sikit nga kombati sa 1st quarter, hinayhinay nga nanginit ang opensa sa 76ers hangtod nga nakaposte sila og 20 puntos ka mga labaw, 75-55.
Adunay higayon ning pagsutoy sa opensa sa 76ers nga nakapasulod og three-point shot si Embiid ug mao na kini ang ningdugkat sa dominasyon sa 76ers.
Ning mga gutloa, kanunay nang giabibahan si Embiid og MVP ! MVP! sa mga dumadapig sa 76ers.
Ang 76ers nagkinahanglan na lang og duha ka mag daog aron makataak sa finals sa labing unang higayon gikan niadtong 2001.
Wala man tuod napugngan sa 76ers ang pambato sa Raptors nga si Kawhi Leonard apan natuman nila ang ilang misyon nga pag-alkontra sa opensiba niini.
“They did a great job scoring. We didn’t,” matod ni Leonard, kinsa maoy nangulo sa Raptors pinaagi sa iyang 33 puntos.
Mismong si Raptors coach Nick Nurse miyukbo sa maayong gipakitang duwa sa 76ers isip usa ka puwersa.
“I think we got outplayed in just about every area we can get outplayed,” asoy ni Nurse.
“It’s been a while since we’ve seen this team play that way.”
Nagkanayon si Embiid nga aduna pa sila’y duhang ikabuga sa pagpadayon sa ilang kampanya ug seguradong pangandaman kini’g insakto sa Raptors.
Matod ni Embiid nga ang tanan nagsilbeng resulta sa gitawag nila nga “Process,” nga nagpasabot sa proseso nga ilang gisunod sa pagporma og lig-ong puwersa.
“We’ve got a lot more to give and do something special,” batbat ni Embiid. (AP, ESL)