MIKUHA og kanhi magduduwa sa National Basketball Association (NBA) ang Meralco Bolts aron makatabang sa ilang kampanya sa umaabot nga 2019 Philippine Basketball Association (PBA) Commissioner’s Cup.
Gitumbok mao si Gani Lawal, usa ka 6’9” nga magduduwa nga gipili sa Phoenix Suns isip No. 46 overall pick niadtong 2010 NBA Draft.
Nagkanayon ang team manager sa Bolts nga mipirma na og kontrata si Lawal.
Ang 30 anyos nga Nigerian-American nakaduwa na sa nagkalainlaing mga nasod.
Lakip sa iyang naduwaan mao ang Poland, China, France, Italy, Turkey, Greece, United Arab Emirates, Spain, Iran, ug Argentina.
Katapusan siyang nidywa sa Shiga Lakestars sa Japanese B.League diin nag-average siya og 21 puntos ug 12.2 rebounds sulod sa 42 ka mga duwa.
Gilaumang makaugbok og lig-ong haligi si Lawal sa ilawom nga bahin sa Bolts nga makapagaan sa trabaho sa ilang bigmen nga sila si Reynel Hugnatan, Ranidel de Ocampo, Nino Canaleta, ug Bryan Faundo.
Ang Bolts nagtinguhang makabawi sa mangil-ad nilang kampanya sa kasamtangang nagpadayon nga Philippine Cup diin nanamilit dayon sila human sa elimination round dala ang 3-8 nga rekord. (ESL)