HUGOT na ang pagpangandam sa University of Cebu-Lapu-Lapu and Mandaue (UCLM) campus high school basketball team sa ilang pagsalmot sa 2019 season sa Cebu Schools Athletic Foundation Inc. (Cesafi).
Si UC athletic director Jessica Honoridez mihatag og kompirmasyon sa pagsalmot sa UCLM sa high school basketball ug hasta sa volleyball events sa Cesafi, usa lang ka tuig human gisugdan sa UCLM ang ilang athletic program.
Sa interbyu sa Sun.Star Cebu, nagkanayon si Honoridez nga ning tuiga lang ilang gilakip ang team sports sa ilang athletic program.
Unang gitutokan sa UCLM sa ilang sports program ang individual events sama sa track and field, swimming, chess, table tennis, badminton, karatedo ug taekwondo.
Gumikan kay bag-o pa ang ilang programa sa basketball, ang kalampusan niini nagdepende sa mga personalidad nga magdumala niini.
Si Reggie Licanda, kinsa sakop sa coaching staff sa UC main basketball team, maoy gikuha ni Honoridez nga mogiya sa UCLM squad.
Nagkanayon si Licanda nga nakompleto niya ang lineup sa UCLM niadto lang Abril 30 human sa sunodsunod nga tryouts nga ilang gipahigayon.
Bisan bag-o pa ang ilang puwersa, gipasalig ni Licanda nga dili sila bastabasta magpalupig ug mokombati sila’g insakto kutob sa ilang mahimo. (RSC, ESL)