KANHI magkapartido sa Barug Alang sa Kauswagan ug Demokrasya (Bakud) party ang magsuong Arquillano ug mag-uyoang Capao sa miaging 2016 elections sa lungsod sa San Francisco, isla sa Camotes.
Apan sa umaabot Mayo 13 nga piniliay, mag-atbang na ang mga kanhi magkaalyado sa pulitika.
Si incumbent San Francisco Bise Mayor Alfredo Arquillano Jr. atbangan ni Konsehal Hector Capao sa pagkamayor.
Si Mayor Aly Arquillano atbangan sa running mate ni Hector nga si Konsehal Aproniano Obenza sa pagka bise mayor.
Ang pag-umangkon ni Hector nga si Aaron Capao, nilingkod nga acting mayor dihang napriso ang magsuong Arquillano, modagan pagkakonsehal sa lungsod.
Sila pulos nanagan ubos sa landong sa One Cebu-Partido Demokratiko Pilipino-Lakas ng Bayan (PDP-Laban) nga gipangulohan ni Cong. Gwendolyn Garcia.
Samtang ang magsuong Arquillano nagpabilin sa Bakud party. Unsay hinungdan nga nilubad ang loyalty ni Hector sa Bakud?
Siya nipasangil nga pinugngan ug kontrolado ang mga kahigayonan sa kalamboan sa ilang lungsod.
“Duha man gud ka klase ang akong gituohan nga leadership. Leadership nga ang imong tawo busgon. Ug ang leadership nga ang imong tawo imo pagutman,” sumala ni Hector dihang nahinabi sa Superbalita Cebu niadtong Huwebes, Mayo 2.
Siya nipasangil usab nga ang mode of transportation daw na-monopolize kay giingong usa ra ka kompaniya sa barko ang gitugotan makabiyahe sa ilang lungsod.
Kini nga alegasyon wala makuhai og habig ang magsuong mayor ug bise mayor.
“Nilubad ang akong loyalty sa among grupo tungod kay nisugod sad ang akong pagbati ngadto sa among mga tawo,” dugang niini.
Iyang gihimakak nga may kalambigitan sila sa pagkasikop ug pagkapriso sa magsuong mga opisyal niadtong Abril 4 gumikan sa mga armas ug granada nga giingong nakuha gikan sa panimay sa mga Arquillano sa Barangay Southern Poblacion, San Francisco. (SCG)