MIAPELAR ang magsuong Arquillano ug si Danao City Mayor Ramon “Nito” Durano III ngadto sa ilang mga dumadapig sa lungsod sa San Francisco, isla sa Camotes, nga ipatigbabaw ang kalinaw, kahusay, ug hustisya sa umaabot piniliay sa Mayo 13.
Gisulti kini sa maong mga opisyal aron pahinumduman ang ilang mga tigpaluyo nga likayan ang pagpanimawos sa ilang mga kaatbang sa pulitika nga ilang gidudahan nga maoy nagpaluyo sa ilang pagkasikop ug pagkapriso niadtong Abril 4.
Ila usab gipalanog ang mensahe ni Padre Ben Alforque atol sa wali sa misa pasalamat niadtong Biyernes sa buntag, Mayo 3, sa St. Joseph Parish sa lungsod.
“Pag-abot bitaw namo gabii (Huwebes), matay daghan niingon nanghinaot mi Mayor, nga nakasuway naman mo og prisohan nga mausab ang inyong, maisog namo. Lisod man mobawos ta. Dili lang ta ana,” pamulong ni Mayor Aly Arquillano atubangan sa ilang gibanabanang sobra sa 300 ka mga dumadapig.
Sila nagtapok sa hamubo nga pakigpulong sa magsuong opisyal ug ni Durano human sa misa, atubangan sa munisipyo.
Sa iyang wali, si Alforque nagkanayon terible ang mabilanggo apan maanindot “kay atong matugkad ug masuta kon unsa nga klaseha ang imong pagkatawo.”
Si Alforque napriso og walo ka buwan panahon sa rehimeng Marcos diin nakasuway kini nga gi-torture.
“Nagtahod sa mayor ug bise mayor, hinaot kon dunay kayugot, ipatigbabaw ang kalinaw sa kasingkasing kay mao kana ang timailhan sa usa ka hamtong nga pulitiko,” sigon sa pari.
Matod niya, ang hamtong nga pulitiko nakakita sa nagkadaiyang klase sa tawo.
“Kon adunay naghunahuna og panimalos, kana nga hunahuna, hunahuna sa mga batan-on, hunahuna sa mga bata. Kay ang hunahuna nga dinagko, dili mangita og panimalos. Mangita siya sa kamatuoran ug sa hustisya,” dugang pagpasabot ni Alforque sa iyang wali.
Si Durano, chairman emeritus sa Barug Alang sa Kauswagan ug Demokrasya (Bakud) party diin mga miyembro ang mga Arquillano, namahayag ang tinguha sa ilang mga kaatbang nga pakauwawan ug pahilumon ang magsuong Arquillano, nahimo na hinuon kini nga simbolo sa katarungan, kahusay ug hustisya sa San Francisco.
“Ang kaning pagdaugdaog sa mga tawo dinhi, mga kaway ra man ni. So, ato gyung puohon ang punoan dinhi sa probinsya ug sa distrito,” pahayag sa mayor sa siyudad sa Danao.
Siya niuban sa magsuong opisyal sa ilang pag-uli sa San Francisco human tugti nga makapiyansa sa mga kasong illegal possession of firearms ug hand grenade.
Si Bise Mayor Alfredo “Al” Arquillano Jr. niingon ang nahitabo niadtong Abril 4 “naghatag og katin-awan, tubag ug daghang mga angay natong masabtan sa ilang lungsod.”
“Katong pag-antos didto sud sa bilanggoan, kamong katawhan dinhi sa atong lungsod worth, balor sa among pag-antos didto,” dugang sa bise mayor.
Emosyonal si Mayor Aly nga nagpasalamat sa iyang asawa nga si Nerissa, presidente sa Association of Barangay Councils sa ilang lungsod, nga maoy kanunay naghatag niya og kalig-on. (SCG)