SI DUMANJUG Mayor Efren Guntrano Gica gipaubos sa 90 ka adlaw nga preventive suspension sugod sa Huwebes, Mayo 2.
Kini nga kalamboan gikompimar ni Department of the Interior and Local Government (DILG) Cebu Director Jerome Gonzales sa usa ka interview sa Biyernes, Mayo 3.
Ang Sandiganbayan maoy nimando sa pagsuspenso kang Gica human sa arraignment sa mga kasong graft, falsification ug malversation.
Ang DILG gihatagan og kopya sa mando sa Sandiganbayan aron sa pagpatuman, diin dunay instruction nga pahibaw-on ang korte sa lakang human sa lima ka adlaw.
Usa ka way numero nga DILG memorandum nga gipetsahan og Abril 30 gikan ni Undersecretary Marivel Sacendoncillo nimando sa regional office sa pagpatuman sa suspension.
Matod ni Gonzales nga iyang gi-serve ang mando sa balay ni Gica sa Dumanjug mga alas 4:30 sa hapon niadtong Huwebes, ug gidawat kini sa mayor.
“The Court hereby orders the suspension pendente lite of accused [...] as Municipal Mayor of Dumanjug, Cebu for a period of ninety days. The Court further orders him to cease and desist from performing and/or exercising the functions and duties as well as receiving and/or enjoying the salaries, benefits and privileges of his current public position or any public office or position he may now or hereafter be holding within such period (of preventive suspension),” matod sa tipik sa DILG memorandum nga pinetsahan og Mayo 2, nga gipirmahan ni Central Visayas interior and local government Director Loecadio Trovela.
Sa miaging tuig, ang Court of Appeals igo rang “mi-noted” sa appeal nga ibalik siya sa position human sa hukom sa Office of the Ombudsman sa pag-dissmiss kaniya gikan sa serbisyo tungod sa serious dishonesty ug grave misconduct sa 2017.
Ang Office of the Ombudsman nitaktak kang Gica sa serbisyo tungod sa pag-tamper sa resibo sa restaurant nga nagbalor og P11,435 aron moburot ngadto sa P21,435 sa 2014.
Human sa pagkasuspenso ni Gica, si Bise Mayor Rainero Asentista molingkod isip acting mayor hangtod sa Hunyo 30 o kon moasumer na ang umaabot nga mga opisyal.
Si Asentista nagpapili isip municipal councilor samtang si Gica nagpasubli.
Matod ni Gonzales nga ang moasumer pagka bise mayor mao ang first councilor basta dunay appointment gikan sa Office of the President kalabot niini.
Si First Councilor Cesar Baricuatro midagan batok kang Gica pagkamayor sa eleksyon sa Mayo 13. (RTF sa SunStar Cebu)