GITIMBANG sa mga Sugboanon ang gipasiatab nga propaganda sa Kapitolyo. Salingkapaw nga mga slogans. Kadtong gibitay nga tarpaulin sa CICC “Never Again” gipahimuslan pinaagi sa pagbaligya ngadto sa Mandaue nga alkansi ang probinsya. Giplastada sa Kapitolyo “ This is a Corrupt Free Institution” balit-ad kay nag-asod ang anomalosong transaksyon sa Cuatro Alas sa buhatan sa gobernador. “Kalamboan sa Matag Sugboanon” kutob lang sa pulong kay walay poyekto nga angayng ikapasigarbo. Dunay serbisyo apan polos sinundog sa nasugdan ni Gov. Gwen Garcia sa unang hugna sa pangalagad. Hapaw ang laing slogan “ Serbisyong Tinud-anay, Matarong ug Hapsay”. Gisundan “ Sa Tinuoray Lang” nga buot ipasabot nga bakak diay ang mga nahauna nga propaganda. Maong gibunyagan sila Vice Gov. Agnes Magpale ug Gov. Junjun Davide nga bakakon sa ilang gibandilyo.
Dihay mga higayon nga nahimong kataw-anan sila Magpale ug Davide. Pag-adto sa habagatang lungsod ang ngalan ni Gov. Garcia maoy gi-welcome sa gibitay nga tarpaulin. Dunay adtoan nga jingle sa One Cebu ang itokar. Dunay lungsod nga sigi lang og groundbreaking apan nahulog og maligno kay walay napabarog nga proyekto. Nag-abot sa usa ka okasyon apan si Garcia maoy gihugopan ug gihangop nunot sa pagpa-selfie tingali gihandom ang iyang pagbalik sa Kapitolyo. Gani liboan ang misugat ni Garcia pagduaw sa mga isla sa Camotes ug Bantayan.
Sa laing lugar gisinggitan si Magpale nga nanghatag og NFA rice nga baho dili makaon sa iro. Dunay misibog sa pagkakita nila Magpale ug Davide kay ang gisugo nasayop sa pagsulti nga si Garcia maoy bisita. Ginawong si Magpale sa usa ka mayor nga wala moamot sa provincial meet diin maoy gipasalamatan si Garcia sa gipahimo nga grandstand. Sa south nga eskuylahan ang kabataan misinggit nga nia si Maam Gwen diin nanglipaghong si Magpale ug nangatawa nalang ang mga magtutudlo. Sa Ronda mihangyo si Davide nga siya nalay sigurohon kay natataw nga dili sila makadaog. ABC president sa Ronda nasipyat maoy gipaila ang sunod nga gobernador si Garcia sa kalihokan nga ila ni Magpale .
Napugos sa pag-isa sa kamot ni Magpale si Davao Mayor Sara Duterte kay mibutho sa kalihokan sa Mandaue nga wala inbitaha ug kalit milinya sa entablado. Gipahimoan ra ba og tarpaulin. Nahimo gihapon nga kataw-anan kay si Garcia mao man diay giisa ug giiindorso ni Mayor Sara. Si Magpale ug kaubanan didto ni Pres. Duterte ug Mayor Sara kay magpasuporta apan gibalibaran kay si Garcia sa One Cebu maoy paluyohan. Sa campaign rally sa 2016 si Duterte wala hatagig permit sa mga Durano ug Magpale. (csa_1156@yahoo.com / 09064648954)