AKONG kanhing kauban sa opisina mi-ingon nga kita tanan di maka-balay ug mabuhi kung way utang.
Mo uyon ka ba ini? Ako dili kay daghan na sab ko’g mga higala nga akong gihimong sumbanan nga mga pobreng hamugaway, pasabot simpli lang ilang pagpuyo apan way daghang utang. Wa gali gikuptang credit card kay puro man cash ang transaction.
Unsaon man pag-impas og dali sa mga utang?
Matud ni Vic Garcia, usa ka motivational speaker ug life and financial coach, angay sutaon ug tubagon kining 4 ka impormasyon: 1.) tibuok kita sa matag buwan, 2.) suma total sa binuwang gastuhan (pagkaon, renta, tubig, suga, og uban pa), 3.) mga bahandi (assets) o kabtangan nga dunay balor sama sa sakyanan, yuta, cellphone, ug 4.) sumada sa tanang utang?
Aron di mahikot sa way katapusang utang, puno ni Garcia, sakripisyo ang yawe aron hinay-hinay kining mabayran. Pananglitan, isakripisyo pagbaligya imong ubang bahandi o kabtangan sama sa balay, yuta, sakyanan kay ining pa-agiha ka usa ra og ratsada nga mahurot pagbayad imong tanang utang.
Akong kaugalingong prinsipyo mao nga kung ang usa ka butang magka-anam og ka mahal magkadugay sama sa yuta, angay kining paliton apan kung ang butang magka anam og ka daot ug ka barato magkadaan sama sa sakyanan, mas bali pang mangabang aron way kabilinggan.
Kung way bahandi nga imong ma sakripisyo og baligya, suwayi pagduol ug hangyo ang imong bangko o gi-utangan aron ma re-structure imong loan og mapatas-an ang panahon sa pagbayad unya di na bug-at sa bulsa.
Sunod, pagpuyo og simpli ug pinubre. Pagtigom unya ipadaplin una ang mga na-andang gasto ug bisyo sama sa pagpanigarilyo, pag-inum, lakwatsa, kaon sa gawas og shopping.
Mas maayo sab nga mangita og dugang trabaho o part time job para dunay extra nga kapaninguhaan o side business human sa trabaho.
Way kumo kung mo suway pagpusta sa lotto basin diay og maswertihan.
Way imposibli ug way problema nga di masulbad inabagan sa pagpasensya, way puas nga paghuwat og pag-ampo.