GIRAKRAKAN ang establisemento nga iya sa Association of Barangay Councils President, Kasambagan kapitan sa Dakbayan sa Sugbo ug negosyante nga si Franklyn Ong, Sabado sa kaadlawon, Mayo 4.
Ang girakrakan mao ang Chevrolet showroom nga nahimutang sa Barangay Ibabao-Estancia, sa Dakbayan sa Mandaue.
Nadawat sa kapulisan sa Centro Police Station ang alarma sa pagpamusil, alas 12:45 sa kaadlawon.
Sa gihimo nga inisyal nga pakisusi, giingon nga usa ka puti nga van ug usa ka motorsiklo ang nihunong sa kilid sa dalan.
Gituohan nga ang nangrakrak ang anaa sulod sa van, human nga usa ka empty shell sa 45 kalibre sa armas ang na-recover pa sa kapulisan sa lugar.
Apan adunay 11 ka igo sa bala diha sa establisemento.
Padayon ang gihimo nga pakisusi karon sa kapulisan sa lugar nga nahitabuan.
Matud ni Police Major Aldrin Villacampa, ang hepe sa Police Station 1, sa Mandaue City Police Office, nga pagpanghadlok o pagpanghulga lang gyud ang gihimo nga pagpangrakrak.
Human nga wala ra gilakip sa pagpusil ang security guard, nga anaa ra sa guard house, dapit sa may parking area kilid sa showroom.
“Pagpanghadlok ra gyud siguro, kay kon naa pay intent to kill, naa ra gud sa kilid ang guard,” saysay ni Villacampa.
Nagpadayon pa ang gihimo nga imbestigasyon sa kapulisan, lakip sad ilang susihon ang kuha sa closed-circuit television sa establisemento ug sa mga nakapalibot, aron pag-ila sa mga responsable.