Ancajas modepensa na sab sa iyang titulo

DEPENSAAN ni International Boxing Federation (IBF) super flyweight champion Filipino Jerwin Ancajas ang iyang korona batok kang Japanese Ryuichi Funai karong udto (Sabado sa gabii sa US) sa Stockton, California.

Mao kini ang ikapitong higayon nga depensaan sa 27 anyos nga si Ancajas ang iyang bakus.

Si Ancajas naggunit og 30-1-2, 20KOs nga rekord samtang si Funai, kinsa karon pa moaway sa gawas sa iyang nasod, adunay 31-7, 22KOs nga baraha.

Nagkanayon si Ancajas nga sakto siya sa preparasyon ug sa iyang tan-aw mao kini ang labing maayo niyang kondisyon sukad masukad.

Sa iyang bahin, si Funai nagkanayon nga naghinamhinam na siyang ipakita sa tibuok kalibutan ang iyang abilidad.

Gipasabot ni Funai nga dako ang iyang pagsalig nga mailog niya ang korona gikan kang Ancajas.

Apan sa mga mata sa mga eksperto, inilog si Ancajas.

Ang away isalida nga live sa ABS-CBN S+A sugod sa alas 10:00 sa buntag. (ESL)