SA BIRTHDAY sa among namatay nga higala, nagkuyog mi ni Police Captain Delfin Bontuyan sa pagduaw sa iyang lubong. Samtang nagsikad mi, nisulti si Delfin nganong di siya ganahan og highway, mas ganahan siya og bukid. Siya nipasabot nga sa highway, imong mahanggap ang aso nga gibuga sa mga sakyanan.
Bitaw, mao usab ni ang akong katarungan nganong mas ganahan ko sa kabukiran. Gawas sa maanindot nga mga talan-awon, minos ang mga sakyanan nga managan sa kabukiran, labina kon mag-trail ride. Kanang mosuot ka og mga kakahuyan, agi sa mga dan nga usa ra ka tawo ang makasubay.
Mga hapit usa ka dekada na ang nakalabay, usa ka pagtuon sa London nipakita sa taas nga level sa pollution sa mga dapit nga daghan og mga sakyanan ug taas ang traffic. Naghatag kini og risgo sa panglawas sa mga tawo sa palibot, labina sa mga siklista.
Mag-unsa man tuod ang imong pag-ehersisyo kon ang imong gihanggap nga hangin dunay particles sa fuel nga gisunog sa mga sakyanan. Sa urban areas diin daghan ang concentration sa mga sakyanan, taas ang level sa air pollution.
Sa health stastics karon dinhi sa Cebu, taas ang mga pulmonary diseases tungod sa air pollution. Gawas sa asong gibuga sa mga sakyanan, grabe sab ang abog.
Di sab init
Sa panahon sa ting-init, labina karong panahuna, duna ka pay masalipdan nga landong sa mga kahoy kon naa ka sa bukid magsikad. Maayo ni sa mga bag-o, wa pa maka adjust sa kainit kay mao pay pagbalik sa mountain biking. Kini ra bang kainit sa adlaw di makompyansahan, labina sa mga middle aged nga tawo sama nako.
Mao ni ang hinungdan sa ubang mga kaso sa stroke. Kadto bitaw nga nanikad mi sa 2012 padung sa Samboan, sa akong pag-abot sa Oslob, niundang na kog sikad tungod sa kasakit sa akong ulo. Kana gung pagsakit sa ulo usa ka symptom nga di maayong pasagdan. Kon nagsikad ka ug naka-feel ka sa kalabad sa ulo, mas maayong mohunong ka, pangitag landong ug inom og tubig. Pabugnawi ang imong lawas sa di ka mopadayon sa biyahe.
Folding bike
Nakabantay ko nga maihap na lang ang folding bikes nga nagdagan sa karsada nga gigamit sa taas nga mga ride. Kon akoy pangutan-on, kon anha ka na man lang sa karsada, ang folding bike is a cheaper and better alternative.
Suwayi og ilis ang imong crankset og ring nga dunay 52-53 ka mga ngipon ug panipisi ang ligid, labing minos 1.5. Unya gamit og 8-speed nga cogs ug shifter, lami na kaayo ang imong biyahe niana bisan 50 kilometros ug balik. Mas paspas ug mas gaan pa na kay sa mountain bike.
Ako ning kasinatian kaniadto. Suwayi, malingaw ka. Mas barato pa ni kay sa RB ug MTB.