NANGHINAOT si Cordova Mayor Mary Therese Sitoy-Cho nga mopadangat og public apology si film director Erik Matti sa iyang pagsaway sa pag-feature sa bakasi sa lungsod sa Cordova sa Netflix’s “Street Food Asia” docuseries.
Matod pa ni Sitoy nga dakong garbo alang sa Cordovahanons nga nahatagan og kahigayonan ang ilang delicacy nga ma-feature sa international audience.
Apan iyang gikasubo nga adunay nisaway niini, inay nga mosuporta tungod kay garbo kini sa mga Pinoy.
Base sa post ni Matti sa iyang social media account, ang luto nga gihatagan og highlight sa Netflix mao ang bakasi diin pipila ray naka-ila niini ug wa magrepresentar sa Pinoy cuisine nga matawag nga “truly Filipino.”
“I respect every idea including Matti. I think offensive sa among part (ang iyang komentaryo). Magtinabangay o support ta kay we’re all Filipinos,” pamahayag ni Sitoy.
Matod pa sa mayor nga naila ang ilang lungsod sa maong delicacy nga dagsaan sa mga kustomer nga gustong mokaon o motilaw niini.
Human kini na-feature, mas nidaghan ang na-interest sa nagkadaiyang luto sa bakasi ug sikat ang linarang ug fried bakasi.
Sa Barangay Buagsong, adunay bakasihan o mga kan-anan nga nag-serve niini.
“Dili ra na sa pobre kay bisag mga datu mokaon ana (bakasi). Si Presidente Duterte nikaon man gani,” pamahayag ni Sitoy.
Ang Cordova adunay tinuig nga Dinagat Festival matag Agusto ingon man food festival nga nag-feature sa bakasi.