SUKWAHI sa naunang panganti sa Department of Education (DepEd)-Davao official nga motapos sa ikalimang pwesto ang Davao Region Athletic Association (Davraa), gikan sa ika-9 sa nakalabay nga tuig, apan karon, natagak naman hinuon kini sa ika-11 nga pwesto, diin ang powerhouse National Capital Region (NCRAA) subling midepensa sa overall crown sa Palarong Pambansa 2019 nga nahuman sa Davao City-UP Sports Complex dinhi, Sabado, Mayo 4.
Ang host region nagkapuliki sa pagsakmit sa 13 ka golds, 22 silvers ug 37 ka bronse sa unom ka adlaw nga kompetisyon.
Sa nakalabay nga tuig, ang Davraa mihakot sa 12 ka golds, 27 ka silvers ug 28 ka bronze.
Ang NCRAA nang-hakot og 86 ka bulawan, 71 plata ug 56 ka bronse rason nga sila nanguna.
Gisundan sab sila sa 66-49-73 Calabarzon, 49-40-58 Western Visayas sa ikatulo, 26-43-40 Soccsksargen sa ikaupat ug 24-22-33 Central Visayas sa ikalima.
Si DepEd-Davao spokesperson Jenielito Atillo, nga unang nanaghap nga mohuman sa ikalimang pwesto ang Davraa, nagkanayon, “We fought a good fight and we will bounce back next year.”
Gihimakak sab niya ang mga report nga wa kaayo matagad ang mga atleta sa Davraa tungod busy sa preparasyon.
“Separate ang training ug hosting. The officials who were running the training are not the ones running the hosting. There’s nothing wrong with the training, only that luck favored our competition.”
Si Philippine Sports Commission chairman William “Butch” Ramirez, mikomento sa final medal tally nagsulti nga matag rehiyon mag-pokus sa swimming ug track and field ug ubang sports nga daghan sila og medalya.
“That’s the strategy of Western Visayas, Calabarzon and Central Luzon,” suma niya.
Uwahing hunat
Ang taga Panabo City nga sila Anghella Coco, Dyna Mae Lampara ug Queencel Regeno uban si Davao City’s Rhea Ville Bausin, nga gigiyahan ni coach Aries Bastian, mihatag sa Davraa sa ika-13 nga gold medal human niini gipildi ang Central Visayas (Cviraa) squad, 15-13, sa Holy Cross of Davao College (HCDC) Gym.
Si Bausin, 18, nga mitigi sa iyang una ug uwahing Palaro nagbutyag sa SunStar Davao, “Basta nagdula lang mi, tiwala lang sa sarili ug sa Ginoo. Wala namo gihuna-huna unsa sila kadagko basta laban lang.”