PAGPANGHULGA o pagpanghadlok lang ang motibo sa gihimo nga pagpangrakrak sa establisemento nga iya sa negosyante ug kapitan sa Kasambagan, dakbayan sa Sugbo, Franklyn Ong.
Ang girakrakan mao ang Chevrolet showroom nga nahimutang sa barangay Ibabao-Estancia sa syudad sa Mandaue.
Nadawat sa kapulisan sa Centro Police Station ang alarma sa pagpamusil, alas 12:45 sa Sabado sa kaadlawon, Mayo 4.
Si Ong ang kasamtangan nga Association of Barangay Council (ABC) president sa Dakbayan sa Sugbo, kinsa kaalyado sa Bando Osmeña Pundok Kauswagan (BOPK).
“Wa gyud plano mopatay. Basin kontra lang sa manager or sa tag-iya ang nagpadangat sa mensahe sa pagpanghulga,” tipik sa text message sa director sa Mandaue City Police Office, Police Colonel Julian Entoma.
Sa inisyal nga pakisusi, giingon nga usa ka puti nga van nga gisundan og usa ka tawo nga nagmotorsiklo ang nihunong sa kilid sa dalan, atubangan sa showroom.
Ang anaa sulod sa van nirakrak sud lang sa pipila ka segundos.
Dali usab dayon nga nakasibat ang mga suspek padung sa amihanan nga bahin sa Siyudad sa Mandaue.
Na-recover sa kapulisan ang usa ka empty shell sa .45 kalibre nga armas sa lugar.
Apan bisan usa ra ka kabhang ang nakit-an, adunay 11 ka mga bangag sa bildo tungod sa pagka-igo sa bala sa establisemento.
Matod ni Police Major Aldrin Villacampa, hepe sa Police Station 1, sa Mandaue City Police Office, nga pagpanghadlok o pagpanghulga lang ang gihimo nga pagpangrakrak.
Wa gilakip sa pagpusil ang security guard, nga anaa ra sa guard house, dapit sa may parking area kilid sa showroom.
Nagpadayon pa ang imbestigasyon sa kapulisan.
Gawas sa kuha sa closed-circuit television sa establisemento, mosusi usab ang MCPO sa silingang tindahan ug balay nga naagian sa mga responsable aron pagkuha sa plaka sa mga sakyanan ug pag-ila sa mga gunman.
Nakig-alayon usab ang kapulisan sa kapitan aron pagsuta kon aduna ba kini mga nadawat nga hulga sa negosyo, sa pagpanerbisyo o sa personal.
Apan si Ong, nagduda nga may kalambigitan sa pulitika ang hitabo. (FMD)