SI KANHI House Speaker Prospero Nograles nipanaw na sa edad nga 71-anyos niadtong Biyernes sa gabii, Mayo 3.
Kini maoy gikompirma mismo ni Cabinet Secretary Karlo Nograles.
Matud ni Sec. Nograles nga malinawon nga nipanaw ang iyang amahan samtang nagpalibot sila niini.
“Papa passed away peacefully, surrounded by his family,” matud sa batan-ong Nograles.
Nihangyo ang batan-ong Nograles og padayon nga pag-ampo alang sa nipanaw nilang amahan.
“May we please ask for your continued prayers. He is finally at peace.”
Samtang nagpasalamat si Sec. Nograles sa tanang nahimong kabahin sa kinabuhi sa ilang amahan.
“Our family would like to express our deepest gratitude to all of you for being a part of Papa Boy Nogie’s life and journey,” dugang pa ni Sec. Nograles.
Nahimong abogado si Nogie kinsa nahiluna sa ikaduhang puwesto sa 1971 Bar examinations. Iyang girepresentahan ang mga biktima sa human rights violations atol sa rehimen ni kanhi pangulong Ferdinand Edralin Marcos, ug nisuporta sa kampanya ni kanhi pangulong Corazon Aquino niadtong 1986 snap elections.
Una siyang napili isip kongresista sa unang distrito sa siyudad sa Davao niadtong 1989, ang puwesto nga iya na sab nga gidaug niadtong 1995.
Subli siyang gipili sa maong posisyon niadtong 2001, sa panahon nga presidente ang kasamtangan karon nga House Speaker nga si Gloria Macapagal-Arroyo, kinsa wa madugay napili sab nga mangulo isip House Speaker niadtong 2008.
Sa dihang natapos na ang iyang termino niadtong 2010, nidagan siya sa pagka-mayor sa siyudad sa Davao, apan napukan ngadto nagpasubli nga anak ni Presidente Rodrigo Duterte nga si Mayor Sara Duterte-Carpio.
Matud ni Sec. Nograles, ang pagserbisyo sa iyang amahan sa publiko, gituldokan sa pagkapili niya isip unang House Speaker nga gikan sa Mindanao “was dedicated to uplifting the welfare of Dabawenyos and the people of Mindanao.”
Kahinumdoman nga si Nograles ug Duterte nagkaribal sa politika sa dugay-dugay nga panahon apan nagkauli sa maayong kabubut-on niadtong Nobyembre 2015, kon diin ang pamilyang Nograles nisuporta sa kandidatura ni PRRD.
Si Nogie nagserbisyo sab isip Speaker of the House of Representatives niadtong 2008 hangtud 2010.
Nagserbisyo sab siya isip tsirman sa partidong Lakas-Christian Muslim Democrats niadtong 2008 hangtud 2009, samtang vice chairman sab niadtong 2009 hangtud 2010. (uban sa taho sa GMA, ABS-CBN)