Maritime police gipatay

USA ka pulis nga nadestino sa Maritime Group sa Camp Crame gipusil patay sa wa mailhing mga mamumuno atubangan sa iyang balay sa usa ka subdivision sa Brgy Babag, Dakbayan sa Lapu-Lapu, alas 7:57 sa Biyernes sa gabii, Mayo 3.

Ang biktima giilang si Police Chief Master Sergeant Joseph Villamor, kinsa kanhi usab nadestino sa City Intelligence Branch (CIB) kaniadto.

Matod ni Police Master Sergeant Mer Acebron sa Police Station 3 sa Lapu-Lapu City Police Office, si Villamor padung magtabon sa iyang motorsiklo gawas sa iyang pinuy-anan dihang adunay duha ka mga lalakeng niabot ug dayong pusil kaniya makadaghang mga higayon hinungdan sa iyang hinanaling kamatayon.

Dali ra usab nga nakasibat ang mga gunman palayo sa dapit nga nahitaboan human sa pagpamusil.

Lakip sa gisusi karon sa kapulisan kon duna bay close circuit television (CCTV) ang subdivision nga gipuy-an ni Villamor diin posibleng nakita ang pagsibat sa mga gunman.

Moabot sa upat ka mga samad pinusilan sa nagkadaiyang bahin sa lawas ang naangkon sa biktima hinungdan sa iyang hinanaling kamatayon.

Moabot usab sa upat ka empty shell ug duha ka mga slug sa gituohang kalibre 9mm nga pistola ang narekober sa kapulisan gikan sa crime scene.

Unsay motibo?

Sa inisyal nga pakisusi sa kapulisan posibleng may kalambigitan sa trabaho ang gitutokang motibo sa pagpusil patay kang Villamor.

Kini human nga sa pakisusi sa mga kabanay niini, giingong wala kini makahisgot nga adunay kontra gawas lang siguro kon adunay nasuko kaniya mahitungod sa operasyon sa kapulisan kaniadto.

Giingong niuli si Villamor sa ilaha sa Brgy. Babag gikan sa kaulohan gumikan kay gikatakdang motambong og hearing sa korte.

Human madestino sa CIB sa LCPO, si Villamor gibalhin sa Luzon sa wa pa kasamtangang nadestino sa Maritime Group sa Camp Crame.

Dunay mga taho nga usa siya sa mga kanhi driver ni retired police director Marcelo Garbo.

“Wala man mi idea pa na-involve ba ni sa drugas kay ang among imbetigasyon nagpadayon pa gyud. Di pud mi kasulti pa ana mga taho nga driver siya kaniadto ni Garbo (kanhi RD sa PRO 7),” matod ni Acebron.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph