ADUNA kitay reklamo nga nadawat gikan sa taga dakbayan sa Mandaue nga matod pa dili momisa ang taga simbahan ug dili motugot nga adto ilubong sa sementeryo sa Romano Katoliko ang usa ka minatay nga wala makasal sa simbahan. Si Msgr. Danny Sanico, team moderator sa St. Joseph Parish sa Mandaue City, giingong maoy nagbuot niini. Kay diha kunoy usa ka tawo nga namatay unya lain og tinuhuan ang nakalusot ug nalubong sa simbahan sa Katoliko.
Kang kinsa man ning balaod? Sa simbahan ni o kang Msgr. Sanico lang? Dili man siguro ni polisiya sa simbahan. Sala na ba diay nga namatay ang usa ka tawo apan wala makasal sa Katoliko? Daghang mga rason nganong ang usa ka tawo dili o wala magpakasal sa simbahan. Unya pugson nila pagpakasal sa tinohoan. Mas bug-at man gani ang makasal sa korte kay kon magpa-annul sa korte man gihapon modangop ang magti-ayon. Ang sa simbahan bendisyon ang importante. Bisan sa kamatayon silutan gihapon ang namatay? Di ni balaod sa simbahan, iya ni ni ‘Sabas Boang’.
Immorality
Atol sa culmination sa National Youth Day sa miaging semana, si Apostolic Nuncio Gabriele Giordano Caccia nanawagan sa mga nag-alagad sa Simbahang Katoliko labi pa ang mga sakristan nga biktima sa sexual abuse sa mga pari nga motaho dayon. Kini aron maputol na ang mga dautang binuhatan sa kaparian nga mopahimulos sa mga altar boys. Kining sexual abuse usa sa mga problema nga naghamok sa simbahan.
Bisan mismo ang Santo Papa, Pope Francis, na-alarma niini. Daghan na kaayong mga kaso nga naglambigit sa atong kaparian. Apan bisan pa man sa hugot nga kampaniya sa kadagkuan sa simbahan, wala pa gihapon kini masumpo kay daghan sa atong kaparian ang nag-practice ning maong immoral nga binuhatan. Dako kaayong tamparus sa kadagkuan sa simbahan kay sila ang angay unta nga mopakita og maayong hiyas kon moralidad ang pagahisgutan apan sila na hinuon ang nagpasaway.
Daghang pari nga nag-practice og homosexuality, nagminyo bisan aktibo pa sa serbisyo, palahubog ug sugarol. Maayo sila motambag sa mga Katoliko nga magtamud sa maayong mithi ug binuhatan apan sila nagpasaway. Maayo unta nga unahon sa pag-limpyo sa simbahan sa mga badlungon nga nag-alagad niini. (bobbygnalzaro@gmail.com)