GIPASAKAAN og kaso sa Ombudsman Visayas si Cebu City Mayor Tomas Osmeña nunot sa kalapasan sa Presidential Decree 1606, Grave Misconduct, Conduct Unbecoming of a Public Official and Neglect of Duty sa usa ka Conrado Romano human makasaksi sa "pagpanugal" sa mayor sa usa ka illegal nga pasugalan nga gitawag og pokerhouse.
Niadtong buwan sa Enero 2019 sulod sa House of Jacks sa Ralph’s Wines and Spirit nga naa nahimutang sa barangay Kamputhaw sa siyudad sa Sugbo iyang nakita maka tulo ka higayon ang mayor nga nanugal.
Ang maong pasugalan gi ronda sa mga sakop sa City Mobile Force Company tungod sa reklamo sa Philippine Amusement and Gaming Corporation nga nag operate nga walay lisensya niadtong Enero 30, 2019 .
Sa maong operation 19 ka tawo ang nangasikop lakip ang Assistant Manager nga si Precy Impas.
Nakadawat og impormasyon si Police Colonel Royina Garma nga dili yano nga pasugalan ang pokerhouse sa House of Jacks sa Ralph’s Wines and Spirit tungod kay adunay mga tag-as nga opisyal ang manugal niini.
“Tes we were told na mayron daw mga public officials, elected officials also and government employees na sighted frequently duon, I really wanted to validate the information but when we conducted the operation were not able to get a copy of the cctv kase walang recording” pamahayag ni Colonel Garma niadtong Pebrero 1, 2019.
Adunay kuha sa CCTV footage si Colonel Garma nga adunay usa ka opisyal sa gobyerno sa siyudad sa Sugbo nga misulod apan wala siyay ebedensya nga nanugal kini.
Usa ka Conrado Romano nga taga Urgello Street sa siyudad sa Sugbo ang miduso sa iyang reklamo sa Ombudsman Visayas labot sa pagpanugal ni Mayor Osmena sa makatulo ka higayon sa manag lahing adlaw.
Mihatag usab siyag hulagway nga naa ang mayor ug ang iyang anak nga si Miguel ug usa ka security officer sa Cebu City Hall.
“The photograph I took while Mayor Tomas Osmeña was playing was done in the first week of January where I was invited by a friend to accompany him in the place and to my surprised I saw the father of the city who was gambling which I believed a violation under the ethical standard of government official and other laws prohibiting elected officials from engaging in gambling.” Tipik sa suwat ni Romano sa Ombudsman.
Sa interview kang Conrado Romano sa Superbalita Cebu siya nagkanayon nga dili na siya maka hinumdom sa petsa nga iyang nakita si Mayor Osmeña nga nag duwag sugal nga poker.
Iyang gitug-an nga naa sila sa sulod aron mo duwa unta sa maong tanang sa sugal apan gipabalibaran sila nga maka duwa tungod kay adunay VIP nga moabot.
Natingala nalang matod pa siya nga sa iyang pagtan-aw sa pikas kwarto si Mayor Osmeña ang naa sa lamesa nanugal usab.
“Nag duwa sad ko ato nya naa may niingun nga dili sa paduwaon ba kay naa kunoy moabot nga VIP, pag ingun nga naay moabot nga VIP nag tan-aw-tan-aw ko, nag tindog-tindog ko didto sa may cashier niabot man ang VIP nga si Mayor man, oy dili ta kaduwa ani kay si mayor man ang ni duwa,” matod ni Conrado Romano.
Siya mismo ang mikuha sa hulagway pinaagi sa iyang cellular phone ug iya kining gitipigan hangtod nga nakahukom siya nga mopasakag reklamo ngadto sa Ombudsman Visayas.
Iyang giangkon nga usa siya ka negosyante og buy and sell sa siyudad sa Sugbo ug ang iyang pagpasakag kaso walay kalambigitan sa politika.
Niadtong Nobembre 2016 si President Rodrigo Duterte mipagawas og Memorandum Circular number 06 pagdili sa tanang public officials ug employees pagsulod sa mga pasugalan.
Si Police Brigadier General Debold Sinas hepe sa Police Regional Office 7 wala na mo luwat og pamahayag labot sa maong kaso ug pasagdan nalang ang Ombudsman nga modungog niini. (AYB)