MAGTIGOM dinhi sa Sugbo sulod sa upat ka adlaw sugod karong Lunes, Mayo 6, ang mga cultural heritage practitioners sa lain-laing mga simbahang Katoliko sa tibuok nasod alang sa 11th Biennial National Convention of Church Cultural Heritage Practitioners sa Cebu Parklane International Hotel.
Si Padre Brian Brigoli, chairman sa Cebu Archdiocesan Commission for the Cultural Heritage, niingon nga apil sa tukion ang maayong practices sa mga simbahan, update sa mga prinsipyo, case studies ug bag-ong teknolohiya nga mosuporta sa restoration procedures sa mga simbahan.
“Mga research papers ni ang i-present related sa conservation, church heritage and management and also the conservation practice,” dason ni Brigoli dihang nahinabi sa Superbalita Cebu niadtong Dominggo, Mayo 5.
Ang Episcopal Commission for the Cultural Heritage of the Church sa Catholic Bishops Conference of the Philippines (CBCP) ang nagpasiugda sa kalihukan nga himuon matag human sa duha ka tuig.
Gibanabanang 150 hangtod sa 200 ka mga partisipante ang motambong sa kalihukan nga naglakip sa mga obispo, kaparian, tourism officers, architects, engineers ug ubang mga layko nga mga chairman, director ug miyembro sa archdiocesan o diocesan ug parish commissions alang sa cultural heritage.
Alas 6 sa gabii sa Lunes, himuon ang opening mass sa Cebu Metropolitan Cathedral ug isunod ang welcome dinner sa Archdiocesan Museum of Cebu, kilid sa Cathedral.
Sa Mayo 8, mag-field tour ang mga partisipante sa karaan nga mga simbahan sa Siyudad sa Carcar ug mga lungsod sa Sibonga, Dalaguete, Boljoon ug Argao.
Matod ni Brigoli tan-awon sa mga partisipante ang restoration projects sa maong mga simbahan nga nahuman nga nangaguba gumikan sa kusog nga linog nga nitay-og sa Sugbo niadtong 2013.
“Kay naa man tay mga projects ining tanan mostly after the earthquake, daghan man ta og mga gipangtrabaho aning mga simbahana gikan sa consolidation sa mga bato to the restoration of the ceiling paintings, retablo and even restoration of the pipe organs. Kay naa man diri ang tulo ka pipe organs. Naa sa Dalaguete, Boljoon ug Argao. Unya ceiling paintings naa sa Sibonga ug Argao,” dugang ni Brigoli.
Ang convention nga i-host sa Archdiocese of Cebu, nagdala sa tema nga “The Importance of the Church’s Cultural Heritage at the Dawn of the 5th Century of the Arrival of Christianity in the Philippines.”