DRAYBER sa usa ka pribado nga truck ang padayon pa nga gipangita, human natabunan sa nidahili nga mga basura sa landfill sa Barangay Polog, lungsod sa Consolacion.
Ang missing hangtud alas 5 Domingo sa hapon, Mayo 5, giila nga si Rodolfo Malasaga, 34 anyos, minyo, taga Barangay Labangon sa Syudad sa Sugbo.
Si Malasaga ang driver sa truck sa RMS Petroleum Technology and waste management.
Kauban niya si Rogelio Tumarlas Jr. 32-anyos, residente sa Cabadbaran City, Agusan Del Norte, ang padulong maglabay og mga basura sa landfill sa Consolacion, ala una sa Sabado sa hapon, Mayo 4.
Matud ni Police Major Gerard Ace Pelare ang hepe sa lungsod sa Consolacion nga nadawat nila ang maong alarma alas 6 Sabado sa gabii.
Giingon nga patungas ang truck sa mga biktima paduol pa sa landfill, sa dihang kalit nga nidahili ang mga basura.
Si Tumarlas ang dali nga nakaambak gikan sa sakyanan, apan si Malasaga ang giingon nga nahibilin.
Gitug-an ni Pelare sa Superbalita Cebu nga Domingo ala una sa kaadlawon, napalgan ang truck, apan wala pa igkita ang drayber.
Dali nga niresponde sa lugar ang Consolacion Emergency Response Team (ACERT), pinanguluhan ni Julius Alegado. (FMD)