NAKALITAN ko ug dili makatuo human nako mahibaw-i nga mipanaw na ang suod ko nga amigo Prospero Boy Nograles, apan sa ngadto ngadto gidawat ko ang kamatuoran nga kitang mga tawo ning kalibutan adunay kinutuban.
Akong isaysay kun ngano, kanus-a kami nagka-ila ug nagkasuod ni Boy Nograles. Dili pa siya politiko, ug tingali nagplano pa, tuig 1983 tulo pa ako ka tuig niadtong tungora sa akong propesyon isip magsisibya sa station dxRD.
Pito ka tuig pa niadtong panahona si kanhi Congressman ug karon Secretary to the Cabinet Karlo Alexei Nograles nga nagtungha pa og Grade 1, ug wala pa usab natawo si party-list Congresman Koko Nograles.
Niadtong panahona, aktibo si Boy sa pagpanlaban sa mga biktima sa tawhanong katungod, mao nga gibansagan siya og Human Rights Lawyer, gikan niadto, padayon ang among panag-suod.
Ug gani, kanunay kaming magdula og bilyard diha mismo sa ilang ancestral business ang Royal House, kauban sila si kanhi Board of Transportation (BOT) regional director ug kanhi konsehal anhing Jesus Jess Zozobrado ug abogado Marcos Resonar, ug uban pang mga batan-ong abogado nga wa na nako igkita karon.
Sa naghinapos na ang tuig 1983, nagplano na si Boy nga mosalmot sa politika sa tuig 1984, tuod man, una niyang gipahibalo kaming mga media nga suod kaayo niya, akong hinganlan ang akong mga kauban nga to-a na sa laing kalibutan, una, Jun Porras Pala, Julius Panares Suizo, Dondon Oliverio, Arman dela Silva, Ferdie 'Batman' Lintuan ug columnist nga si Bert Tesorero.
Miabot ang eleksiyon sa tuig 1984, kansa nagpa-re-elect sila si Assemblyman Manuel Nonoy Garcia, ug Assemblywoman Felly Santos, upat sila ka kandidato nidtong tungora, duha ang nagpasubli, ug duha silang bag-o, si Boy Nograles ug Zafiro Respicio, pildi si Felly Santos, na re-elect si Manuel Nonoy Garcia, ug si Zap Respicio ang gi-swerte, pildi si Boy. Si Dondon Oliverio maoy nag-angga niya og Boy Nogie.
Hangtud padayon siya sa iyang political careerusahay mapildi, usahay modaug. Straight nga pagkatawo si Boy Nogie, dili tig-ulog-ulog prangkahan ka maayo man o dili, sultihan ka gyud niya. Duha lang ka igsuon niya ang akong nailhan ug suod kaayo, sila si Gerry, ug Annie.
Nagka-distansiya lang ang among panagsuod ni Boy Nogie, sa dihang nahimo na siyang House Speaker sa 14th Congress, Pebrero 5 tuig 2008, hibawo kana duna na’y mga bag-ong salta nga media practitioner tingali duna nay mga intrega, nagkalayo, ug nagkalayo na, pero kung ako siyang tawgan sa selpon, iya man sad ko nga tubagon bisan og speaker na siya.
Katapusan namong panagkita personal, niadtong Desyembre 20, tuig 2017 iya akong gipatawag nga muadto sa iyang balay, sa Doña Vicenta, dugay-dugay kaming nagka-estorya hisgut-hisgot sa nangagi, "AL G" ang iyang tawag nako sukad pa sa sinugdanan, diretso Boy ang akong tawag niya, kay manghud nako siya og duha ka bulan ug 13 ka adlaw.
Rest in peace Boy, dili ug dili ko mahimong malimtan ang taas-taas nga kutay sa katuigan sa atong panag-uban isip media, ug ikaw politiko, dili ko makalimot nga kaduha ka nakaadto sa balay atol sa akong birthday ug kana niadtong 1985, ug 1986, dugay na pero dili ko kalimot lakip na ang atong pagkuyog paingon sa Manila mga sayo nga bulan sa tuig 1987.
Sa pamilyang Nograles, Madam Beth Bendigo Nograles Karlo, ug Koko ug uban pang mga igsuon, condolence kaninyo, dili malimot AL.