NAGSUBO ang kabanayan, kahigalaan ug ang mga supporters ni kanhi House Speaker Prospero 'Boy' Nograles human kini mipanaw sa edad nga 71-anyos, Biyernes sa gabii, Mayo 3.
"Papa passed away peacefully, surrounded by his family. May we please ask for your continued prayers. He is finally at peace," ni Cabinet Secretary Karlo Nograles.
Nagpasalamat si Karlo sa katawhan kinsa nakaila sa iyang amahan gikan pa sa unang pagsalta niini sa politika sayong katuigan sa dekada 80.
"Our family would like to express our deepest gratitude to all of you for being a part of Papa Boy Nogie's life and journey," ni Secretary Nograles.
Nahimong abogado si Nogie kinsa nahiluna sa ikaduhang puwesto sa 1971 Bar examinations. Iyang girepresentahan ang mga biktima sa human rights violations atol sa rehimen ni kanhi pangulong Ferdinand Edralin Marcos, ug nisuporta sa kampanya ni kanhi pangulong Corazon Aquino niadtong 1986 snap elections.
Si Nograles ug President Rodrigo Duterte nagkaribal sa politika sa dugay-dugay nga panahon apan nagkauli sa maayong kabubut-on niadtong Nobyembre 2015, kon diin ang pamilyang Nograles nisuporta sa kandidatura ni PRRD.
Sa natad sa politika bisan pa og kompare mo, di kini moila, apan molugdang kini sa pag-uliay sa buot, sama ni Nogie ug Digong, kompare sila, nag-away gumikan sa politika, ug nagkauliay ra sab sa maayong kabubut-on.
Busa angay lamang hunahunaon sa mga nagkalaban karon sa politika nga di maayong magdumot sa kaatbang, mas maayong ipakita ang tiunay nga gugma, kay di gayod masayran kanus-a mopanaw ang tawo sa kalibutan, basin unya diha ra makapasaylo.
Apan sa sitwasyon sa managhigalang Nogie ug Digong, niadtong 2015 pa sila nagbalik sa maayong buot, ug lagmit nagpinasayloay na sila.
Rest in peace, Boy Nogie.