MAGTIGOM dinhi sa Sugbo sud upat ka adlaw sugod karong Lunes, Mayo 6, ang mga cultural heritage practitioners sa lainlaing simbahang Katoliko sa tibuok nasod alang sa 11th Biennial National Convention of Church Cultural Heritage Practitioners sa Cebu Parklane International Hotel.
Si Padre Brian Brigoli, pangu sa Cebu Archdiocesan Commission for the Cultural Heritage, niingon nga apil sa tukion ang maayong practices sa mga simbahan, update sa mga prinsipyo, case studies ug bag-ong teknolohiya nga mosuporta sa restoration procedures sa mga simbahan.
“Mga research papers ni ang i-present related sa conservation, church heritage and management and also the conservation practice,” dason ni Brigoli dihang nahinabi sa Superbalita Cebu niadtong Dominggo, Mayo 5.
Ang Episcopal Commission for the Cultural Heritage of the Church sa Catholic Bishops Conference of the Philippines (CBCP) ang nagpasiugda sa kalihokan nga himuon matag human sa duha ka tuig.
Gibanabanang 150 hangtod sa 200 ka mga partisipante ang motambong sa kalihokan nga naglakip sa mga obispo, kaparian, tourism officers, architects, engineers ug ubang mga layko gikan sa lainlaing artsidyosesis ug diyosesis sa Pilipinas.
Karong alas 6 sa gabii, himuon ang opening mass sa Cebu Metropolitan Cathedral ug isunod ang welcome dinner sa Archdiocesan Museum of Cebu, kilid sa cathedral.
Sa Mayo 8, suroyon sa mga partisipante ang karaan nga mga simbahan sa siyudad sa Carcar ug mga lungsod sa Sibonga, Dalaguete, Boljoon ug Argao. (SCG)