MOABOT sa 25,000 ka mga dumadapig ang nitambong sa gipahigayong miting de avance” sa Team Deretso sa kampo sa mga Radaza sa Mactan Export Processing Zone (Mepz) football field niadtong gabii sa Sabado, Mayo 4.
Kini ang pangangkon sa Team Deretso. Ang maong rally maoy katapusan na sa kampo sa mga Radaza usa ka semana sa dili pa ang piniliay sa Mayo 13.
Wala man tuoy mga kandidato pagka senador ang nitambong sa kalihukan apan nagpadala kini sa ilang mga representante.
Mga kandidato pagka senador sa Partido Demokratiko Pilipino-Lakas ng Bayan (PDP-Laban) ni Presidente Rodrigo Duterte ang gipaluyohan sa kampo sa mga Radaza alang sa umaabot piniliay.
Sa gidaghanon sa nitambong, gipadayag sa standard bearer sa partido nga si Arturo “Boy” Radaza nga “daog na” ang piniliay sa dakbayan.
Matod ni Radaza, nagpakita lang kini nga wala motuo ang mga tawo sa pagpangilad sa ilang kaatbang bisag unsa pa ang gibuhat nga mugna niini sa milabayng mga adlaw.
Sa iyang bahin, si Team Libre standard bearer Junard “Ahong” Chan nipadaplin sa pangangkon sa kampo sa mga Radaza ug mibutyag nga moabot usab sa 30,000 ka mga dumadapig niya ang motambong sa iyang ipahigayong miting de avance” kagabii, Dominggo, Mayo 5, sa Barangay Pajac.
Matod ni Chan nga mga binayran ang nitambong sa rally sa kampo sa mga Radaza.
Iya usab gikataw-an ang pangangkon sa kampo sa mga Radaza sa planong kagubot nga iyang mugnaon. (B)