GIPASAKAAN og kaso sa Ombudsman Visayas si Cebu City Mayor Tomas Osmeña human makit-i sa tulo ka higayon nga nanugal sa usa ka pasugalan nga walay lisensiya.
Si Conrado Romano, ang nikiha sa mayor, adunay tulo ka mga litrato diin makita si Osmeña nga naglingkod sa poker table uban ang pipila ka players.
Iyang gikiha si Osmeña nunot sa kalapasan sa balaod mahitungod sa kahiwian sa lihok sa usa ka public official.
Ang Department of Interior and Local Government (DILG) Memorandum Circular 2017-20 nagklaro nga gidili sa mga opisyal ug empleyado sa gobiyerno ang pagsulod ug pagsugal sa gambling casinos.
Gitubag ni Osmeña ang alegasyon batok kaniya.
“I will answer all. That’s normal. They always come up with things. I’m going to die, I’m like this, I’m like that. I’ve never been convicted by the Ombudsman. Never.”
Matod ni Romano nga niadtong Enero 2019 sulod sa House of Jacks nga naa sulod sa usa ka wine shop sa Barangay Kamputhaw, Cebu City iyang nakita makatulo ka higayon ang mayor nga nanugal.
Ang maong pasugalan gironda sa mga sakop sa City Mobile Force Company niadtong Enero 30, 2019 tungod sa reklamo sa Philippine Amusement and Gaming Corp. (Pagcor) nga nag-operate nga walay lisensya.
Sa maong operation, 19 ka tawo ang nangasikop lakip na ang assistant manager niini.
Nakadawat og impormasyon si Cebu City Police Chief P/Col. Royina Garma nga dili yano nga pasugalan ang poker house sa House of Jacks tungod kay adunay mga tag-as nga opisyal sa gobiyerno ang manugal niini.
Si Romano, taga dan Urgello sa siyudad sa Sugbo, ang niduso sa iyang reklamo ngadto sa Ombudsman Visayas labot sa pagpanugal ni Osmena sa makatulo ka higayon sa managlahing adlaw. Mihatag usab siya og mga hulagway nga naa si Osmeña ug ang iyang anak nga si Miguel ug usa ka security officer sa Cebu City Hall.
Matod ni Romano ngadto sa Ombudsman, nakit-an niya ang mayor nga nanugal niadtong unang semana sa Enero. Gikuyog siya sa iyang amigo sa poker house ug matod niya, nakurat siya pagkakita niya ni Osmeña sa sulod.
Sa pakighinabi kang Romano sa Superbalita Cebu, siya nagkanayon nga dili na siya makahinumdom sa petsa nga iyang nakita ang mayor nga nagduwa og poker. Matod niya, naa sila sa sulod aron moduwa unta apan gipabalibaran sila tungod kay adunay VIP nga moabot.
Natingala nalang siya, matod ni Romano, nga sa iyang pagtan-aw sa pikas kwarto ang mayor ang naa sa lamesa nanugal usab. “Nagduwa sad ko ato nya naa may niingon nga dili sa paduwaon ba kay naa kunoy moabot nga VIP.
Pag-ingon nga naay moabot nga VIP, nagtan-aw- tan-aw ko. Nagtindog-tindog ko didto sa may cashier niabot man ang VIP nga si Mayor man! Oy, dili ta kaduwa ani kay si Mayor man ang niduwa,” matod ni Romano.
Siya mismo ang nikuha sa hulagway pinaagi sa iyang cellular phone ug iya kining gitipigan hangtod nga nakahukom siya nga mopasaka og reklamo ngadto sa Ombudsman Visayas.
Matod ni Romano, nagnegosyo siya og buy and sell sa Cebu City ug ang iyang pagpasaka og kaso walay kalambigitan sa politika. (B)