SECTIONS
Wednesday, August 21, 2019
SUPERBALITA CEBU

Nadela: Senior citizen ug PWD sa eleksiyon

NAGPAABOT pa og guidelines ang buhatan sa Senior Citizen gikan sa Comelec alang sa mas hapsay ug komportabli nga pagbotar sa mga senior citizens ug persons with disability (PWD) sa umaabot nga pimiliay. Kini maoy nahipos nakong kasayuran gikan kang Lourdes Limpangog, pangu sa Office of Senior Citizens Affairs (Osca) sa dakbayan sa Sugbo. Gipakikitaan nako si Ma’m Lourdes sa niaging semana aron i-follow up ang pipila ka isyu may labot sa atong mga senior citizens. Usa niini mao ang ilang pagbotar diin ang ilang mga presento nahimutang sa mga tag-as nga building diha sa atong mga publikong eskwelahan. Pangindahay sa mga senior ug PWD unta himoong sayon ang ilang paggamit sa ilang katungod sa pagpili taliwala sa kainit sa politika nga nasinati karon.

Bisan ang mga masakiton angayan usab nga konsiderahon ang ilang kahimtang. Nakahibalo ko daghan ang may mga problema sa ilang blood pressure. Pun-an pa sa kainit sa panahon, angayan lang kining pangandaman sa mga tinugyanan sa panglawas. Ang atong mga disaster risk reduction managers naghimo ba og mga plano nga malikayan ang pagka apiki sa ubang botante nga may kabilinggan sa ilang panglawas? Nakasiguro ko dunay daghan ang mosugal pagtunga sa ilang presento bisan kong di mada sa lawas. Siguro gipahimagnoan na sa ilang mga doktor ang uban nila nga di isakrapisyo ang ilang panglawas pagdumdum sa ilang presento. Unta ang ilang mga kabanay mohimo og mga pagpangandam pinaagi sa hugot nga pagmonitor. Kong di gyud makaya ipadaplin lang una ang tinguha nga suportahan ang ilang mga napili nga mga kandidato, kay sa mabutang sa peligro ang ilang panglawas. Kong mahimo pa lang unta nga kining mga senior, PWD, mabdos ug may mga balatian adto sa mga lawak nga may mga airconditioning unit unya di na kinahanglang magsaka kanaug.

Diha koy nadunggan nga sugyot nga imposibling mahitabo sa pagka karon mao ang mga mall nga kumpleto sa pasilidad. Unya kay El Niño man, mangutana ta sa taga DepEd kumusta man ang inyong mga pansayan? Naay tubig nga magamit? Kapait kong maabtan ta sa sugo sa lawas unya ang mga pansayan way tubig nga magamit. Busa pahimagno alang natong tanan para sa adlaw sa piniliay. Mas maayong mosayo. Di na magpaabot og grasya gikan sa mga kandidato. Sa mga nakagrasya nang daan sa kinamangay samot nga di na maglangaylangay di ba? Kong gikinahanglang magbawon buhaton kini kay basin makasugat og kalangay sa presento. Ang mga tambal para sa mga may maintenance di kalimtan. Mas makadaginot kong magbawon og tubig. Payong, paypay ug trapo sa singot.

Para makalikay sa daghang inspection di na magdala og mga bagahi. Sa mga inahan nga may masusu, sayod na siguro sa inyong angay dad-on. Mas bentaha nga may kuyog mo nga makapuli og kugos. Sa mga first timer mas bentaha nga karon pa lang magpakisayod namo sa mga suheto sa mga lagda. Unya kadtong may gihuptan nga katungdanan gikan sa mga kandidato nga inyong gisuportahan timan-i nga daghang mga mata ang nakatutuk ninyo. Di lang gikan sa Comelec, ug PNP, labaw sa tanan sa mga kaatbang nga kandidato o partido. Gamay nga kasikas mahimo kining pabilo sa dakong problema sa mga polling center. Kasamok likayan. Kabubut-on sa mga botante ipatigbabaw.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph