TUNGOD sa pagnihit sa tubig atol sa huwaw nga dala sa El Nino phenomenon, ang Metropolitan Cebu Water District (MCWD) miluwat og advisory nga nag-awhag sa katawhan, ilabi na sa ilang libo ka libong mga konsumidor, nga “use water wisely.”
Wa klaroha kon unsa kanang use water wisely. Apan kon wise ka, di ka mag-usik-usik sa tubig aron gamay rang mabayran nimo sa MCWD. Sa laktod, pagdaginot. Pero way mausik nga tubig kon way agas kay nagkuwang man karon ang supply sa tubig.
Dihay bana nga wa makaklaro kon unsa kanang use water wisely. Mao nga iyang gidungan sa pagkaligo ang ilang batan-on nga maid. Sus nasakpan man sa asawa. Igo lang siyang niingon, “Sorry, Love. Miingon man gud ang MCWD nga use water wisely.”
***
Gipaabot nga molanat pa ang huwaw hangtod sa Agusto. Ang Philippine Atmospheric, Geophysical and Astronomical Services Administration (Pagasa) niingon nga base kini sa nagkadaiyang El Niño forecast models.
Ang MCWD niingon nga niubos na supply sa Jaclupan Dam sa Talisay City. Si Charmaine Rodriguez-Kara, tigpamaba sa MCWD, niingon nga ang supply gikan sa maong sam nikunhod ngadto sa 7,000 cubic meters gikan sa 36,000 cubic meters matag adlaw.
“As we brace for the impact of a prolonged dry spell, we urge all Cebu water users to develop a habit of conservation and to use water wisely,” matod pa niya.
***
Mahibaw-an lang ang kanihit sa tubig panahon sa ting-init. Sa session sa Cebu City Council bahin sa suliran sa tubig niadtong miaging Martes, nahibaw-an nga sud sa digay nang panahon, ang MCWD napakyas sa iyang obligasyon sa pag-supply og tubig sa mga konsumidor.
Kinsa man ang mabasol niini? Ang MCWD o ang mga opisyales sa syudad nga nagkontrolar sa MCWD? Duna bay gihimo ang mga opisyales sa syudad Sugbo sa pagsulbad sa water crisis sa kadugay na nilang panerbisyo?
Ang suliran sa tubig pareho ra sa problema sa drainage. Way tubig kon ting-init, baha kon ting-uwan. Kon ting-init mamalit og water containers. Kon magbaha, ambot lang, mamalit silag pumpboat?