GIINGONG walay kamatuoran ang nagkatag sa social media kalabot na sa suspensiyon ni Cagayan de Oro City Mayor Oscar Moreno nga gi-post sa Facebook page nga CDO Social Weather niadtong Huwebes, Mayo 2.
Gipanghimakak kini sa kampo ni Moreno ug una na usab nga nibutyag si Maricel Casiño-Rivera nga wala kini kamatuoran gumikan kay sila ang unang masayod kung ugaling dunay mogawas nga order kalabot sa kaso ni Moreno.
Sa gipagawas nga pahayag ni Rivera niadtong Biyernes, Mayo 3, gitumbok niini ang kaatbang sa politika ni Moreno nga si Jose Gabriel “Pompee” La Viña nga maoy nagpasiugda niining peke nga impormasiyon.
“In his desperation, Pompee's camp is gearing up its fake news machinery. They will fail. There is no truth to the information spread by CDO Social Weather Facebook page that the Sandigan Bayan issued a preventive suspension order vs Mayor Moreno,” sa gipagawas nga pahayag pinaagi ni Rivera.
Nagkatag sa social media ilabi na sa post gikan sa CDO Social Weather page nga nakabutang ang screenshot nga giingong suspensiyon ni Moreno nga dunay, “SB-18-CRM-0496 to 0497 People vs. Oscar Moreno.et.al ug SB-18-CRM-0388 People vs. Oscar Moreno.et.al,” ug anaay caption nga, “JUST IN NEWS: Sandiganbayan Releases Resolution on OSCAR MORENO’s Preventive Suspension! ABANGAN...”
Makita nga ang maong resolusiyon gikan sa Sandiganbayan mao ang pito ka pahina diin na-denied ang gipasa ni Engr. Rolando Pacuribot nga ma-defer ang arraignment sa duha ka mga kaso nga graft ug falsification sa public documents.
Kahinumdoman nga nag-atubang sa maong kaso sila si Pacuribot nga kanhi Misamis Orintal assistant provincial engineer lakip na si Moreno samtang mao pa kini ang gobernador usab niadtong panahona ug laing pipila ka mga opisyal kaniadto sa Misamis Oriental, apan ang maong nigawas nga resolusiyon niadtong Abril 29 alang lamang kini kay Pacuribot.
Samtang ipanghimakak usab sa kampo ni La Viña ang pagtumbok sa kampo niini nga maoy nagpasiugda sa giingong peke nga impormasiyon ug gani giingong ginasulti man mismo ni La Viña ang mga kahiwian ni Moreno.
“Natingala man gani mi ngano kami gipasanginlan, in fact gabii na mi na-inform nga naay ing-ana mga post sa Sandiganbayan, siguro ila lang na diversionary tactics aron e-insinuate nga gahimo amo kampo og fake news when in fact sa side ni Tito Pompee harapan man niya ginasulti ilang mga kahiwian,” pahayag ni Nicole Managbanag.