USA ka low pressure area (LPA) ang nasigpatan nga anaa sa gawas sa nasud nga gimonitor sa Philippine Atmospheric, Geophysical and Astronomical Services Adminstration (Pagasa), apan gamay ra ang kahigayunan nga mahimo kini nga bagyo.
Posible sa Martes, Mayo 7, o sa Miyerkules, Mayo 8, makasulod ang LPA sa nasud nga kasamtangang anaa pa sa gawas sa Philippine area of responsibility (PAR) sa silangan nga bahin sa Mindanao o sa Visayas.
Apan gitug-an usab ni Engr. Al Quiblat, ang chief sa Pagasa-Central Visayas, nga gamay ang kahigayunan nga mahimo nga bagyo.
Panghinaot man nga makasud kini sa nasud aron makadala og mga pag-ulan, apan nalantawan nga dili gihapon kini kaepekto sa grabe nga kainit sa panahon ning semanaha, tungod sa presensya sa frontal system.
Ang frontal system ang anaa sa northern Luzon area nga maoy nakahatag og pipila ka pag-ulan sa ilang lugar.
“Ang frontal system, rain-making system na siya, pero wala man ni-epekto sa atua (Visayas), dire ra sa northern Luzon, so ang mga area ra didto mao ra ang makasinati og ulan, pero naa tay gi-monitor nga low pressure area, gawas pa sa PAR, ang chance nga makasud taas. Base sa mga available data nga gamay ang chances nga mahimo siya nga bagyo ug moepekto sa nasud, tungod aning frontal system nga mohatak niya palayo sa nasud, kon dili man gani siya mahilis,” pagpasabot ni Quiblat.
Samtang niadtong Sabado, alas 12:19 sa udto, Mayo 4, natala na usab ang pinakataas nga temperatura sa Sugbo, ning tuiga nga niabot sa 35.1 degree Celcius, kansang kainiton nga nabatyagan o heat index niabot sa 45 degrees Celsius.
Nalabwan niini ang natala sa Pagasa Mactan sa pinakataas nga temperatura niadtong Abril nga niabot sa 43 degrees Celsius ang heat index.
Apan gipaabot pa nga mas motaas pa gyud ang kainiton nga mabatyagan sa mga mosunod nga adlaw nga posibleng moabot sa 47 degrees Celsius, tungod sa daghang kaigang kon humidity nga dala sa hangin ning panahuna.
Usa sa nakatampo ang presensya gihapon sa weak El Niño.
“Init, alimuot, wala tay sistema nga daku nga makaapekto sa Visayas, naa gihapon ang localized thunderstorm labi na sa hapon ug sa gabii, dunay chance nga pagpanag-pm unya dunay kalit-kalit nga pag-ulan, pero dili magdugay. Ang atong likayan ani, ang mag-expose ug dugay sa adlaw kay niadtong Sabado atong na-record ang pinakainit, pinakataas nga temperature ning tuiga, naa kini sa danger nga category,” pagpasabot ni Quiblat.