ARON mas dali alang sa mokuha og lisensiya ingon man dili kini maglibog, gilahi na usab sa Land Transportation Office (LTO) Central Visayas ang licensing ug registration niini sa ilang extension office sa dakbayan sa Talisay.
Kagahapon pormal nang gibukas sa LTO ang managlaghi nga buhatan nila alang sa licensing ug registration sa Talisay Extension Office sa South Central Square, Barangay Lawaan 3.
Matod ni LTO 7 director Victor Caindec nga anaa ra sa usa ka lokasyon ang parehong registration ug licensing office apan lahi kini og office entrances.
"Para mas sayon sa clients. Dili ma mix ang licensing and registration," si Caindec nagkanayon.
Ang maong lakang subay kini sa tumong ni Caindec nga gidili na maghuot ang publiko kon panaglitan magkuha kini og rehistro o lisensiya.
Lakip sa mga buhatan sa LTO 7 nga gilahi na ang licensing ug registration ang Cebu City District Office ug Lapu-Lapu City Office.
Ug gibutyag ni Caindec nga mosunod ang buhatan nila sa siyudad sa Tagbilaran sa Bohol, siyudad sa Danao ug Toledo ug Dumaguete City sa Negros Oriental.
Wala nigasto ang LTO 7 niini tungod kay public- private partnership kini.
Daan na nga tumong ni Caindec mao ang nga hamugaway ang transaksyon sa publiko sa tanang buhatan sa LTO 7.