Roldan: Pagboto basi sa konsensiya

UNOM ka adlaw na lang og ipahigayon na ang bugnong lugaynon o ang eleksiyon.

Ipahinumdom nato nga “mid-term election” kini nga buot ipasabot nga dili kita magpili og presidente o bise presidente. Hinunua, atong pilion ang 12 ka senador, mga kongresista sa matag “congressional district”, mga representante sa party list nga mahimong sakop sa kongreso, mga gobernador sa probinsiya, mga mayor sa kalungsoran ug kasiyudaran, ug ang katapusan mao ang mga sakop sa konseho sa probinsiya, siyudad ug lungsod.

Walay eleksiyon karon sa mga kapitan ug kagawad sa barangay apan daghang kapitan sa barangay karon ang nanagan pagka-konsehal sa siyudad ug lungsod kay puwede ra man silang mobalik sa ilang daang puwesto sa barangay kung maparot.

Sa akong tan-aw, mas daghang mga kapitan sa siyudad sa Davao ang nanagan karon kung itandi sa nilabay nga piniliay.

May nag-ingon nga posibleng taktika kini sa administrasyon aron matangtang kadtong mga nanggungis ug daan na kaayo sa politika.

Ang uban kay mga sakop sa pamilya ang ilang gipadagan kay human na ang ilang termino.

May nibalik sab nga mga karaan kay basin pa’g wa kalimti ang ilang pangalan sa madlang pipol.

Bintaha kadtong nakaugat ug ilado ang pangalan kay gamay na lang nga karinyo, lamano ug agbay sa abaga sa botante kay seguradong maapil sila sa balota.

Mao ni ang maayong kinaiya sa Pinoy nga dili mahutdan og paglaum.

Sa laing bahin daghang mabasa sa social media nga mga pabor ug kontra sa kandidato. May nag-ingon nga lahi na ang klase sa mga senador karon kung itandi sa mga unang panahon sa bag-o pa ang atong republika.

May tirada nga ubos na sa bakos ug naglinabayay og lapok. Kanya-kanya ang kampanya sa administrasyon ig kontra administrasyon.

Nagpungasi ang ads sa radyo og TV bisan kahibalo kita nga halos P1 milyon ang 30 segudos nga ads sa primetime TV.

Tungod kay walay nahitabong dinagkong debati karon sa mga kandidato, nagpahigayon ang mga TV networks ug kanya-kanyang paagi nga mogawas ang mga isyu ngadto sa publiko.

Sa gabii sa Dominggo, imbis mga kandidato, nagharong sa usa ka TV program ang kontra sa pipila ka programa sa administrasyon ug mga dagkong opisyal sa gobyerno.

May nag-post sab sa social media nga moboto kita basi sa atong konsiyensa.

Ingon pa niya “I am a mature and responsible citizen. Therefore, I shall not elect anyone who bribes, cheats, lies, steals or kills; nor tolerate anyone who does.”

Kung atong hubaron, “Hamtong ug responsable akong lumulupyo. Busa, dili nako pilion kadtong nanuhol, nanikas, kawatan o mopatay; o mosugot lang nga buhaton kini nila.”

Hapit na ang piniliay og unta makapili kita sa mga angayan sa puwesto.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph