Editoryal: Hulaw, natapos na?

NING nilabay nga mga adlaw, nakasinati kita og sunod-sunod nga mga pag-ulan sa dakbayan sa Davao ug sa pipila ka bahin sa Davao Region.

Human sa dugay-dugay nga panahon nga wala kita duawa niini, gibundakan na gyud kita og mga ulan nga gani nipabaha pa sa daghang kadalanan sa siyudad.

Kagahapon, nasayran nga dunay low pressure area (LPA) ang nasiplatan sa Mindanao nga naa pa gawas sa Philippine Area of Responsibility (PAR) nga gitumbok sa Japan Meteorological Agency.

Base sa pagbanabana, ang LPA mosulod sa PAR ugmang adlawa.

Hinuon, giklaro nga ang maong LPA wala pay epekto sa Pilipinas sukad kagahapon.

Apan pipila ka bahin sa nasud makasinati pa gihapon og mga pag-ulan, ilabi na sa Davao Region.

Mga mag-uuma sa kabukiran nalipay sa nasinati nga ulan kay nakatilaw na og tubig ang ilang mga pananum o ba kaha mamahimo na silang motanum.

Ning mga pag-ulan karon, tilimad-on na ba kaha kini nga mahuman na ang giingong hinay nga El Nino nga nakaapekto sa di lang sa Mindanao, apan daghang lugar sa tibuok nasud?

Unta magpadayon na ang mga pag-ulan ilabi na nga Mayo na karon, kon diin naandan nga ang maong bulan maoy panahon kon diin mga kabulakan mobuswak.

Apan tungod sa climate change, posibleng ang maong kapanahonan apektado na ug duna nay kausaban karon.

Gawas pa ang Philippine Atmospheric Geophysical, and Astronomical Services Administration (Pagasa) una nang nagtaho nga molungtad pa hangtud sa Hulyo ang hulaw dinhi sa nasud.

Related Stories

No stories found.
SunStar Publishing Inc.
www.sunstar.com.ph