MAGUINDANAO PROVINCE -- Grupo sa Bangsamoro Islamic Freedom Fighters (BIFF) ang nagpadagan sa giingong drug den ug himuan sa mga improvised explosive device (IED) nga gisunog sa mga awtoridad alas 9 sa buntag, Dominggo, sa Barangay Bulod, Sultan Sabarongis sa probinsiya.
Nasayran nga wa damha nga nadiskubre sa mga sundalo ug pulis nga nagpahigayon og law enforcement operation ang drug den ug bomb factory.
Gihulagway nga gipalibutan og mga kural, barb wires ug barriers ang mga balay mao nga nagduda ang militar ug kapulisan.
Apan wala maabti ang mga suspek sa diha nga gisulod sa hiniusang puwersa sa 33RD Infantry Batallion, Criminal Investigation Group sa Bangsamoro Autonomuos in Muslim Mindanao, 2nd Mech Company, 43rd SAC, 4th SAB ug mga opisyal sa Barangay Bulod.
Nakuha gikan sa mga balay ang kahimanan sa pagggama og bomba sama sa kuryente, lansang, cellphones, scrap metals ug mga puthaw.
Duna say mga military uniforms nga nakuha nga posibleng gigamit sa mga rebelde nga BIFF.
Samtang nadiskitahan nga palibot sa mga balay gitamnan sab og mga marijuana hinungdan nga gipang-ibot kini sa mga awtoridad.
Gawas pa niini, dunay mga naka-pack nga marijuana seeds ug dahon sulod sa mga balay.
Gikompirma sab ni LTC Elmer Boongaling, commanding officer sa 33rd Infantry Battalion, Philippine Army nga di lang himuanan og bomba o IEDs ang nahisgutang dapit kon di gihimo sab kining drug den.
Aron nga di na pahimuslan og balik sa mga suspek, gisunog kini sa mga awtoridad. (Edgar E. Fuerzas)