UNTA manakod kini sa ubang barangay aron makita sab unsa kadaseg ang mga batan-on sa paggamit sa ilang kusog alang sa kaayohan sa komunidad.
Niadtong Mayo 1, liboan ka mga batan-on ningsalmot sa cleanup drive sa Gusa-Lapasan bypass road doul sa Equiparco sa coastal road.
Pinangulohan ni Kagawad John Michael Seno, presidenti sa Sangguniang Kabataan Federation, ang kapin sa 1,300 ka mga batan-on ninggahin sa ilang oras paglimpiyo sa coastal area.
Ang ilang tema nga “Kabatan-onan, Kauban sa Kinaiyahan” haom kaayo sa atong panahon karon nga gipasagdan ang atong kalikopan.
Sukwahi sa ubang mga batan-on nga mihabig sa “walhon” nga idolohiya, kining ginsakopan ni Seno wala maghugawhugaw sa dalan, wala magsinggit-singgit og kausaban, ug labaw sa tanan wala sila maghasol sa publiko.
Hinuon, gipakita nila ang kausaban diha sa pagsalmot sa mabungahon nga kalihukan.
Sa bisan asang parti sa nasod, matag Mayo 1, atol sa selebrasiyon sa Labor Day, kining mga militanting grupo mag-martsa dayon sa kadalanan.
Unya, human sa ilang rally magbilin og hugaw ug basura sa palibot.
Wa nay kaulaw sa ilang gipanghimo. Mangugat og kausaban batok sa pamunoan, apan sila mismo sa ilang kaugalingon maglisod pag-usab. Dili gihapon sila mohunong bisan giyam-iran na sa katawhan ang ilang “komunistang” pakigbisog ug pangilad.
Mao ni ang sakit nga kamatuoran sa atong palibot. Dunay duha ka klase sa grupo sa mga batan-on -- kadtong maalamon ug kining mga “buringog” nga pulos lang kadaotan ang gipanghimo sa katilingban.
Busa, bulahan kadtong mga ginikanan nga “maalamon” ilang mga anak, nagpabilin nga produktibo sa katilingban ug naghatag og kaayohan sa komunidad. Samtang, alaot intawon kadtong mga ginikanan kinsang mga anak tua nagwaldas sa kadalanan aron ipatigbabaw ilang bulok nga panaghiusa.
Bisan unsaon nato og kwenta, mas bug-at gyud ang gipahimo niadtong mga batan-on nga misalmot sa cleanup drive kon itandi niadtong mga batan-on nga nag-rally sa kadalanan.
Unta mahigmata na kining mga batan-on nga nasaag lang sa hiwi nga pagtuo aron makita nato ang kooperasiyon sa tanang kabataan sa atong siyudad.
Kudos sa programa nga gipasiugdahan ni Kagawad Seno. Palihug ayaw kini undanga, ipadayon kon mahimo buhaton nga regular ang paglimpiyo sa atong siyudad.